انٹر کا پرچہ ڈی جے کالج سے کیسے آؤٹ ہوا؟ انکوائری ہو گی،ڈائیریکٹر کالجز

کراچی(نیوزڈیسک)ڈائریکٹر کالجز مصطفیٰ کمال کا کہنا ہے کہ انٹر کا کیمسٹری کا پرچہ ڈی جے کالج کے احاطے سے کیسے آؤٹ ہوا؟ اس پر انکوائری ہو گی۔

کراچی میں انٹر کے امتحانات میں بارہویں کا کیمسٹری کا پرچہ وقت سے پہلے آؤٹ ہونے کے معاملے پر ڈائریکٹر کالجز مصطفیٰ کمال نے آدم جی سائنس کالج، ایس ایم آرٹس کالج اور ڈی جے سائنس کالج کا دورہ کیا۔

اس موقع پر ڈائریکٹر کالجز مصطفیٰ کمال نے ایس ایم آرٹس کالج کی ویجلنس آفیسر کی عدم حاضری پر تشویش کا اظہار کرتے ہوئے کہا کہ کالج میں پرچہ ویجلنس آفیسر کے بغیر کھولا گیا۔

انہوں نے کہا کہ ویجلنس آفیسر کا امتحانی مرکز میں موجود نہ ہونا بورڈ انتظامیہ کے لیے سوالیہ نشان ہے۔

محکمۂ تعلیم سندھ کے مطابق ڈائریکٹر کالجز مصطفیٰ کمال نے اس موقع پر ناظمِ امتحانات سے اس معاملے پر ٹیلیفونک رابطہ بھی کیا۔

ڈائریکٹر کالجز مصطفیٰ کمال نے ہدایت کی ہے کہ ریگولر ویجلنس آفیسر کو کالج میں تعینات کیا جائے۔

ان کا کہنا ہے کہ پرچہ ڈی جے کالج کے احاطے سے کیسے آؤٹ ہوا اس پر انکوائری ہو گی۔

محکمۂ تعلیم سندھ کے مطابق ڈائریکٹر کالجز مصطفیٰ کمال نے ڈی جے سائنس کالج کے پرنسپل سے اس ضمن میں جواب طلب کر لیا۔

واضح رہے کہ کراچی کے اعلیٰ ثانوی تعلیمی بورڈ کے تحت انٹر میڈیٹ کے امتحانات کا آج دوسرا روز ہے۔

صبح کے اوقات میں آج لیا جانے والا بارہویں جماعت کا کیمسٹری کا پرچہ شروع ہونے سے قبل سوشل میڈیا پر آؤٹ ہونے کے بعد وائرل ہو گیا تھا۔