اسلام آباد میں سرکاری حکام نے خبردار کیا ہے کہ غیر رجسٹرڈ وی پی این ملک کی قومی سلامتی کے لیے سنگین خطرہ بنتے جا رہے ہیں، اس لیے عوام انہیں ہرگز استعمال نہ کریں۔ حکام کے مطابق دہشت گرد، غیر ملکی ایجنٹ، جرائم پیشہ عناصر اور شدت پسند اپنی شناخت چھپانے کے لیے غیر قانونی وی پی این استعمال کرتے ہیں، جن کے ذریعے حملوں کی منصوبہ بندی، افواہیں، پروپیگنڈا اور غیر قانونی سرگرمیاں چلائی جا رہی ہیں۔ ایسی سرگرمیوں سے ہر شہری غیر محفوظ ہو جاتا ہے، اس لیے صرف پی ٹی اے سے منظور شدہ وی پی این استعمال کرنے کی ہدایت دی گئی ہے۔
حکومت نے گیس کی قیمتوں کا سہ ماہی تعین کرنے پر کام شروع کردیا
آئی ٹی ماہرین کا کہنا ہے کہ زیادہ تر مفت اور غیر رجسٹرڈ وی پی این محفوظ نہیں ہوتے، یہ دراصل صارف کا ڈیٹا چوری کرتے ہیں اور یوزرنیم، پاس ورڈ، بینک تفصیلات اور ذاتی معلومات خفیہ طور پر محفوظ کرتے رہتے ہیں۔ ماہرین کے مطابق یہ ’’خاموش چور‘‘ آپ کی شناخت چرا کر ہیکرز، غیر ملکی اداروں یا جرائم پیشہ نیٹ ورکس کو بیچ سکتے ہیں، اس لیے ہمیشہ لائسنس یافتہ وی پی این استعمال کرنا ضروری ہے۔
حکام نے مزید بتایا کہ غیر قانونی وی پی این پورے ملک کے لیے مالی نقصان کا باعث بن رہے ہیں۔ ان کے ذریعے قانونی گیٹ ویز بائی پاس ہو رہے ہیں جس کی وجہ سے اربوں روپے کے ٹیکس اور فیس بیرون ملک منتقل ہو رہے ہیں اور قومی خزانے کو نقصان پہنچ رہا ہے۔ انٹرنیٹ پر اضافی بوجھ کی وجہ سے رفتار بھی متاثر ہوتی ہے جس سے گھریلو صارفین اور کاروبار دونوں مشکلات کا شکار ہوتے ہیں۔
سرکاری حکام اور آئی ٹی ماہرین نے عوام کو مشورہ دیا ہے کہ غیر رجسٹرڈ وی پی این استعمال نہ کریں، قانونی وی پی این اپنائیں، تاکہ خود بھی محفوظ رہیں اور ملک کو بھی محفوظ بنا سکیں۔
