مغربی افریقہ کے ملک گنی بساؤ میں فوجی بغاوت ہو گئی ہے، جس کے بعد فوج نے صدر کو معزول کر کے اقتدار سنبھالنے کا دعویٰ کر دیا ہے۔
خبر رساں ایجنسی کے مطابق گنی بساؤ میں اتوار کو صدارتی انتخابات ہوئے تھے اور صدارتی انتخابات کے نتائج کا اعلان ہونا تھا۔
اسلام آباد: غیر قانونی اسلحہ رکھنےکے الزام میں جے یو آئی رہنما فرخ کھوکھرگرفتار
صدر اُمارو ایمبیلو اور حریف فرنینڈو ڈیاس دونوں نے کامیابی کا دعویٰ کیا تھا، لیکن نتائج کے اعلان سے قبل ہی فوج نے اقتدار پر قبضہ کر لیا۔
دارالحکومت بساؤ سے نشر ہونے والے ریاستی ٹیلی ویژن پر فوجی افسران نے صدر کو عہدے سے برطرف کرنے کا اعلان کیا اور کہا کہ تمام ریاستی ادارے اگلے حکم تک معطل رہیں گے۔
گنی بساؤ فوج کا کہنا ہے کہ ملک کی سرحدیں اور فضائی حدود بند کر دی گئی ہیں اور ملک میں کرفیو نافذ کر دیا گیا ہے۔ آئینی نظام کی بحالی تک انتخابی عمل تاحکم ثانی معطل رہے گا۔
فوجی افسران نے ایک اعلیٰ فوجی کمان تشکیل دی ہے جو ملک کا نظم و نسق سنبھالے گی۔
رپورٹس کے مطابق فوجی بغاوت کے اعلان سے قبل الیکشن کمیشن، صدارتی محل اور وزارت داخلہ کے قریب فائرنگ کی آوازیں سنی گئیں اور یہ سلسلہ تقریباً ایک گھنٹہ جاری رہا۔ تا حال کسی جانی نقصان کی اطلاع نہیں ملی ہے۔
دوسری جانب صدر کے ترجمان نے بتایا کہ نامعلوم افراد نے الیکشن کمیشن پر حملہ کر کے انتخابی نتائج کا اعلان روکنے کی کوشش کی ہے۔
