چیئرمین جوائنٹ چیفس آف اسٹاف جنرل ساحر شمشاد مرزا نے آج جنرل ہیڈ کوارٹر میں آرمی چیف فیلڈ مارشل سید عاصم منیر ایچ جے سے الوداعی ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران چیف آف آرمی اسٹاف نے جنرل ساحر شمشاد مرزا کی قیادت، پیشہ ورانہ صلاحیتوں، اسٹریٹجک بصیرت اور پاک افواج کے لیے طویل خدمات کو خراج تحسین پیش کیا۔
’ہمارا کام بولتا ہے‘، شرجیل میمن کا ایم کیو ایم کی تنقیدوں پر ردعمل
فیلڈ مارشل عاصم منیر نے کہا کہ جنرل ساحر کی قیادت میں تینوں مسلح افواج کے درمیان ہم آہنگی مضبوط ہوئی، مشترکہ آپریشنل تیاریوں میں اضافہ ہوا اور قومی سلامتی کے اسٹریٹجک اہداف مؤثر انداز میں آگے بڑھائے گئے۔ انہوں نے خطے میں استحکام، عسکری سفارت کاری اور دوست ممالک کے ساتھ دفاعی روابط مضبوط بنانے میں جنرل ساحر کے کلیدی کردار کو بھی سراہا۔
آئی ایس پی آر کے مطابق جنرل ساحر شمشاد مرزا نے اپنے کیریئر کے دوران حاصل تعاون پر آرمی چیف اور پاک افواج کا شکریہ ادا کیا۔ جی ایچ کیو آمد پر فیلڈ مارشل نے یادگار شہداء پر پھولوں کی چادر چڑھائی اور پاک فوج کے چاق و چوبند دستے نے انہیں گارڈ آف آنر پیش کیا۔
