بالی وڈ کے لیجنڈری اداکار دھرمیندر 89 برس کی عمر میں انتقال کر گئے۔
بھارتی میڈیا کے مطابق پیر کو دھرمیندر نے ممبئی میں اپنے گھر پر آخری سانسیں لیں۔ ان کی رہائش گاہ کے باہر متعدد بالی وڈ اداکاروں اور ان کے اہلخانہ کو سفید لباس میں آتے دیکھا گیا۔ کچھ روز قبل دھرمیندر ممبئی کے بریچ کینڈی اسپتال میں بھی کئی روز تک داخل رہے۔
معروف فلم ساز کرن جوہر نے بھی انسٹاگرام پر دھرمیندر کے انتقال کی تصدیق کی اور انہیں خراجِ تحسین پیش کیا۔ بھارتی میڈیا کا کہنا ہے کہ انہیں دو ہفتے قبل سانس لینے میں دشواری کے باعث اسپتال منتقل کیا گیا تھا جبکہ رواں سال اپریل میں ان کی آنکھ کی سرجری بھی ہوئی تھی۔
رپورٹس کے مطابق دھرمیندر نے آخری بار اپنی اداکاری کا مظاہرہ فلم ’اکیس‘ میں کیا، جو 25 دسمبر کو ریلیز ہونے والی ہے۔
دھرمیندر نے اپنے کیریئر کا آغاز 1960 میں فلم ’دل بھی تیرا ہم بھی تیرے‘ سے کیا تھا۔ انہیں 2012 میں حکومت ہند کی جانب سے پدم بھوشن، جو کہ ملک کا تیسرا بڑا شہری اعزاز ہے، سے نوازا گیا تھا۔
چھ دہائیوں پر مشتمل اپنے فلمی سفر میں دھرمیندر نے ’شعلے‘، ’یادوں کی بارات‘، ’میرا گاؤں میرا دیش‘، ’نوکر بیوی کا‘، ’پھول اور پت‘ اور ’پھول اور پتلی‘ جیسی متعدد ایوارڈ یافتہ فلموں میں کام کیا۔ وہ پنجاب کے لدھیانہ کے ایک گاؤں میں دھرمیندر کیول کرشن دیول کے نام سے پیدا ہوئے۔ فلم انڈسٹری میں آنے سے پہلے انہوں نے 19 سال کی عمر میں 1954 میں پرکاش کور سے شادی کی، بعدازاں انہیں اداکارہ ہیما مالنی سے پیار ہوا اور انہوں نے ان سے بھی شادی کر لی۔
دھرمیندر 89 سال کی عمر میں بھی سوشل میڈیا پر سرگرم رہے۔ وہ اکثر وہ ویڈیوز شیئر کرتے رہے جن میں صحت مند طرزِ زندگی کو فروغ دیا جاتا تھا۔ ان کی انسٹاگرام پوسٹس میں انہیں ٹریکٹر چلاتے، فارم کی دیکھ بھال کرتے، مداحوں کو سادہ زندگی کے اسباق اور کاشتکاری کے مشورے دیتے ہوئے دیکھا گیا۔
