اسلام آباد: 27ویں آئینی ترمیم پر مسلم لیگ (ن) اور پاکستان پیپلز پارٹی کے درمیان جاری مذاکرات کے دوران پیپلز پارٹی نے صدر کو تاعمر استثنیٰ دینے اور قومی احتساب بیورو (نیب) کے خاتمے کا مطالبہ پیش کر دیا۔
اقوام متحدہ میں پاکستان کی ہتھیاروں کے کنٹرول اور جوہری سلامتی سے متعلق 4 قراردادیں منظور
آئین کی شق 248 کے تحت صدر کو اپنے عہدے کی مدت کے دوران فوجداری کارروائی سے استثنیٰ حاصل ہوتا ہے، جس میں درج ہے کہ ان کے خلاف کسی عدالت میں کوئی کارروائی نہ تو شروع ہو سکتی ہے اور نہ جاری رکھی جا سکتی ہے۔ تاہم پیپلز پارٹی نے اس استثنیٰ کو تاعمر بڑھانے کا مطالبہ کیا ہے، جس کے بعد صدر کے عہدہ چھوڑنے کے بعد بھی ان کے خلاف کوئی مقدمہ نہیں چلایا جا سکے گا۔
پارٹی نے نیب کے خاتمے کا بھی مطالبہ کیا ہے، جو میثاقِ جمہوریت کا حصہ تھا۔ 2006 میں مسلم لیگ (ن) اور پیپلز پارٹی کے درمیان ہونے والے اس معاہدے میں فیصلہ کیا گیا تھا کہ نیب کی جگہ ایک خودمختار احتساب کمیشن قائم کیا جائے گا جو پارلیمانی نگرانی میں شفاف طریقے سے کام کرے گا۔
ذرائع کے مطابق ترمیم کا حتمی مسودہ پارلیمانی کمیٹی کی رپورٹ کے بعد قومی اسمبلی اور سینیٹ میں پیش کیا جائے گا۔
پیپلز پارٹی کے رہنما مرتضیٰ وہاب، جو مسلم لیگ (ن) کے ساتھ مذاکراتی ٹیم کا حصہ ہیں، نے کہا کہ پارٹی صدر، گورنر، وزیر اعظم، وزرائے اعلیٰ اور وزیروں کے لیے آئین کے آرٹیکل 248 کے تحت حاصل آئینی تحفظات کی بحالی کا مطالبہ کر رہی ہے، جنہیں سابق چیف جسٹس افتخار چوہدری نے منسوخ کر دیا تھا۔
انہوں نے بتایا کہ پیپلز پارٹی چاہتی ہے کہ میثاقِ جمہوریت کے تمام غیر نافذ شدہ نکات، خصوصاً نیب کا خاتمہ، ترمیم میں شامل کیے جائیں۔
مرتضیٰ وہاب کے مطابق، کچھ نکات پر حکومت اور اتحادی جماعتوں میں اتفاق رائے ہو چکا ہے اور انہیں ترمیمی مسودے میں شامل کیا جا چکا ہے، جبکہ نیب کے خاتمے سے متعلق تجویز پر مزید مشاورت جاری ہے۔
ان کا کہنا تھا کہ مسلم لیگ (ن) بھی اصولی طور پر اس مؤقف سے متفق ہے کہ نیب کو ختم کر کے ایک بہتر احتسابی نظام لایا جانا چاہیے، جیسا کہ دونوں جماعتوں نے میثاقِ جمہوریت میں وعدہ کیا تھا۔
