اسلام آباد: اپوزیشن اتحاد تحریک تحفظ آئین پاکستان کے ترجمان نے کہا ہے کہ پاکستان تحریک انصاف (پی ٹی آئی) کے بانی عمران خان نے اتحاد کے صدر محمود خان اچکزئی اور سینیٹر علامہ راجا ناصر عباس کو حکومت یا اسٹیبلشمنٹ سے مذاکرات کا اختیار دے دیا ہے۔
چین نے 48 ممالک کیلئے ویزا فری پالیسی میں توسیع کر دی
ترجمان کے مطابق عمران خان نے پی ٹی آئی کے تمام رہنماؤں کو ہدایت کی ہے کہ وہ حکومت یا اسٹیبلشمنٹ سے کسی بھی قسم کے رابطے سے گریز کریں۔ ان کا کہنا تھا کہ عمران خان کی جانب سے واضح طور پر صرف محمود خان اچکزئی اور علامہ راجا ناصر عباس کو مذاکرات کا اختیار دیا گیا ہے، باقی تمام رہنما کسی بھی سطح پر بات چیت کے مجاز نہیں ہیں۔
ترجمان نے مزید کہا کہ اگر حکومت یا اسٹیبلشمنٹ کو مذاکرات کرنے ہیں تو وہ صرف انہی دو رہنماؤں سے بات کرے۔
قبل ازیں عمران خان کی بہن ڈاکٹر عظمیٰ خان نے اڈیالہ جیل میں ملاقات کے بعد میڈیا سے گفتگو میں بتایا تھا کہ عمران خان نے کہا ہے کہ فارم 47 یا اسٹیبلشمنٹ سے کسی قسم کی بات چیت نہیں ہوگی، البتہ اگر کوئی بات ہوگی تو وہ محمود خان اچکزئی کے ذریعے ہوگی کیونکہ وہ تحریک تحفظ آئین پاکستان کے سربراہ ہیں۔
