وزیر دفاع خواجہ محمد آصف نے کہا ہے کہ ضرورت پڑنے پر طالبان رجیم کو شکست دے کر دنیا کے لیے مثال قائم کی جا سکتی ہے۔ استنبول مذاکرات کے ناکام رہنے کے پس منظر میں اپنے بیان میں انہوں نے کہا کہ افغان طالبان رجیم مسلسل برادر ممالک سے مذاکرات کی درخواست کر رہا تھا اور انہی درخواستوں پر پاکستان نے امن کے لیے مذاکرات کی پیشکش قبول کی۔
خواجہ آصف نے بعض افغان حکام کے زہریلے بیانات کی طرف اشارہ کرتے ہوئے کہا کہ اس سے معلوم ہوتا ہے کہ طالبان رجیم میں انتشار اور دھوکا دہی پائی جاتی ہے۔ انہوں نے واضح کیا کہ طالبان رجیم کو ختم کرنے یا انہیں غاروں میں چھپنے پر مجبور کرنے کے لیے پاکستان کو اپنی پوری طاقت استعمال کرنے کی ضرورت نہیں پڑے گی۔
وزیراعظم آزادکشمیرکیخلاف تحریک عدم اعتماد پر پیپلزپارٹی اور ن لیگ میں ڈیڈ لاک ختم
وزیر دفاع نے کہا کہ اگر ضرورت ہوئی تو ہم انہیں تورا بورا جیسے مقامات پر شکست دے کر دنیا کو ایک مثال دکھا سکتے ہیں، اور یہ اقوامِ عالم کے لیے ایک دلچسپ منظر ہوگا۔ انہوں نے افسوس کا اظہار کیا کہ طالبان رجیم اپنی قابض حکمرانی اور جنگی معیشت کو بچانے کے لیے افغانستان کو ایک اور تنازعے میں دھکیل رہی ہے۔
خواجہ آصف نے مزید کہا کہ طالبان حکام اپنی کمزوریوں اور جنگی دعوؤں کی حقیقت کو جانتے ہوئے بطور نمائش جنگی طبل بجا کر بظاہر عوام میں اپنی گِھڑتی ہوئی ساکھ بحال کرنے کی کوشش کر رہے ہیں۔ اگر افغان طالبان دوبارہ افغانستان اور اس کے معصوم عوام کو تباہ کرنے پر بضد ہیں تو جو کچھ بھی ہونا ہے وہ ہوگا، اور جہاں تک "قبرستانِ سلطنتوں” کے بیانیے کا تعلق ہے پاکستان خود کو کسی سلطنت کا حصہ نہیں سمجھتا۔
وزیر دفاع نے کہا کہ حقیقت یہ ہے کہ طالبان کی وجہ سے افغانستان اپنے ہی لوگوں کے لیے ایک قبرستان بن چکا ہے؛ اگرچہ تاریخی طور پر افغانستان ہمیشہ طاقتوں کے کھیل کا میدان رہا ہے۔ انہوں نے خبردار کیا کہ وہ جنگجو جو خطے میں بدامنی پھیلانے سے ذاتی فائدہ اٹھا رہے ہیں وہ پاکستانی عزم اور حوصلے کو کم نہ سمجھیں۔
خواجہ آصف نے واضح کیا کہ اگر طالبان رجیم لڑنے کی کوشش کرے گی تو دنیا دیکھے گی کہ ان کی دھمکیاں محض دکھاوا تھیں۔ پاکستان اپنی سرزمین پر کسی بھی دہشت گردانہ یا خودکش حملے کو برداشت نہیں کرے گا اور کسی بھی مہم جوئی کا جواب سخت اور کڑوا ہوگا۔ انہوں نے طالبان رجیم کو خبردار کیا کہ اپنے انجام کا حساب رکھیں، کیونکہ پاکستان کے عزم اور صلاحیتوں کو آزمانا ان کے لیے بہت مہنگا ثابت ہوگا۔
