قاہرہ: وزیراعظم پاکستان شہباز شریف غزہ امن معاہدے پر دستخط کی تاریخی تقریب میں شرکت کے لیے مصر کے شہر شرم الشیخ پہنچ گئے۔
ائیرپورٹ پر مصر کے وزیر ڈاکٹر اشرف صبحی نے وزیراعظم پاکستان کا استقبال کیا۔ اس موقع پر نائب وزیراعظم و وزیرِ خارجہ اسحاق ڈار اور وزیرِ اطلاعات عطااللہ تارڑ بھی وزیراعظم کے ہمراہ موجود تھے۔
پاکستان اسٹاک ایکسچینج میں شدید مندی
وزیراعظم شہباز شریف نے اپنے بیان میں کہا کہ وہ تاریخی “غزہ امن منصوبے” کی دستخطی تقریب میں شرکت کے لیے شرم الشیخ پہنچے ہیں، یہ معاہدہ مشرقِ وسطیٰ میں پائیدار امن کی جانب ایک اہم قدم ہے۔ انہوں نے شریک میزبانوں، مصری صدر عبدالفتاح السیسی اور امریکی صدر ڈونلڈ ٹرمپ کا شکریہ ادا کیا، یہ کہتے ہوئے کہ اس موقع کا حصول صدر ٹرمپ کی غیر معمولی قیادت اور عزم کے بغیر ممکن نہ تھا۔
شہباز شریف نے مزید کہا کہ امن کے لیے صدر ٹرمپ کی کوششوں نے برسوں سے جاری خونریزی اور تباہی کے خاتمے کی راہ ہموار کی، آج کی تقریب ایک طویل اور المناک باب کے اختتام کی علامت ہے، جس کے دوبارہ کھلنے سے عالمی برادری کو ہر قیمت پر روکنا ہوگا۔
انہوں نے کہا کہ بہادر فلسطینی عوام ایک آزاد ریاست کے حقدار ہیں، جو 1967 کی سرحدوں کے مطابق ہو اور جس کا دارالحکومت القدس الشریف ہو۔
واضح رہے کہ شرم الشیخ میں آج غزہ امن معاہدے پر دستخط کی باضابطہ تقریب منعقد ہو رہی ہے، جس میں امریکا کے صدر ڈونلڈ ٹرمپ سمیت مختلف ممالک کے سربراہان شریک ہیں۔
