کابل: افغان طالبان نے سابق وزیر اعظم اور حزبِ اسلامی کے سربراہ گلبدین حکمت یار کو بیرون ملک سفر سے روک دیا۔
گلبدین حکمت یار کے بیٹے حبیب الرحمان حکمت یار نے دعویٰ کیا کہ طالبان حکومت نے ان کے والد کو ملک سے باہر جانے کی اجازت نہیں دی۔
غیر ملکی میڈیا کے مطابق حبیب الرحمان نے سماجی رابطے کی ویب سائٹ ایکس پر لکھا کہ طالبان نہ صرف گلبدین حکمت یار کی عوامی ملاقاتوں میں رکاوٹ ڈال رہے ہیں بلکہ ان ملاقاتوں سے خوفزدہ بھی ہیں اور انہیں خطرناک تصور کرتے ہیں۔
انہوں نے کہا کہ طالبان دیگر سیاسی رہنماؤں کو ملک واپس آنے کی دعوت دیتے ہیں اور سلامتی کی یقین دہانی کراتے ہیں، لیکن میرے والد کے بیرون ملک جانے پر پابندی عائد کر دیتے ہیں۔
حبیب الرحمان حکمت یار کا کہنا تھا کہ کیا طالبان کا مقصد یہ ہے کہ تمام رہنما واپس آکر ان کے کنٹرول میں رہیں تاکہ ان کی ملاقاتوں، سرگرمیوں اور سفر پر پابندیاں لگائی جا سکیں؟
میڈیا رپورٹس کے مطابق گزشتہ چار برسوں سے طالبان حکومت نے سیاسی رہنماؤں، سابق حکومتی شخصیات اور قبائلی عمائدین پر سخت پابندیاں عائد کر رکھی ہیں، اور ان میں سے بیشتر کو بیرون ملک جانے کی اجازت نہیں دی جاتی۔
یاد رہے کہ طالبان نے افغانستان میں تمام سیاسی جماعتوں کی سرگرمیاں معطل کر رکھی ہیں اور کسی بھی سیاسی اجتماع یا تنظیمی سرگرمی کو باضابطہ طور پر ممنوع قرار دے رکھا ہے۔
