خیبرپختونخوا کے نئے وزیر اعلیٰ کے انتخاب کے لیے پاکستان تحریک انصاف (پی ٹی آئی) کے بانی عمران خان نے خصوصی ٹیم کو ٹاسک دے دیا ہے جبکہ بیرونِ ملک موجود اراکینِ صوبائی اسمبلی کو فوری طور پر وطن واپس بلایا گیا ہے۔
پی ٹی آئی کے مرکزی رہنماؤں کو بھی پشاور طلب کر لیا گیا ہے۔ بانیِ پی ٹی آئی کی جانب سے مرکزی اور صوبائی قیادت کو متحد رہنے کی ہدایت جاری کی گئی ہے، جبکہ صوبے میں حکومت کی تشکیلِ نو کے لیے جنید اکبر، اسد قیصر اور بابر سلیم سواتی کو ذمہ داریاں سونپی گئی ہیں۔
پارلیمانی پارٹی کے ذرائع کے مطابق لیگل ٹیم سے وزیراعلیٰ کے انتخاب کے حوالے سے مشاورت مکمل کر لی گئی ہے اور آئندہ 72 گھنٹوں میں نئے وزیر اعلیٰ کا انتخاب متوقع ہے۔ ذرائع کا کہنا ہے کہ موجودہ سیاسی صورت حال کے تناظر میں اپوزیشن کی حکمتِ عملی پر بھی تفصیلی غور کیا گیا۔
مزید بتایا گیا کہ بیرونِ ملک موجود پی ٹی آئی کے اراکینِ اسمبلی کو فوری واپسی کی ہدایت دی گئی تھی، جس پر عمل درآمد شروع ہو چکا ہے۔ عارف احمد زئی، نذیر عباسی اور تاج محمد ترند وطن واپس پہنچ گئے ہیں، جبکہ آصف محسود اور شیر علی آفریدی بھی وزیر اعلیٰ کے انتخاب میں شرکت کے لیے واپس آ چکے ہیں۔
