پاکستان کرکٹ بورڈ کی سلیکشن کمیٹی نے قومی ٹی ٹوئنٹی ٹیم کے کپتان سلمان علی آغا پر مکمل اعتماد کا اظہار کیا ہے، اور امکان ہے کہ وہ جنوبی افریقا کے خلاف ٹی ٹوئنٹی سیریز میں گرین شرٹس کی قیادت جاری رکھیں گے۔
ذرائع کے مطابق کپتان سلمان علی آغا اور کوچ مائیک ہیسن کے درمیان جنوبی افریقا سیریز اور آئی سی سی ٹی ٹوئنٹی ورلڈ کپ کے حوالے سے اہم مشاورت ہوئی۔ دونوں کا مقصد عالمی ایونٹ سے قبل ٹیم کے کمبی نیشن کو مزید مضبوط اور مستحکم بنانا ہے۔
ذرائع کا کہنا ہے کہ ٹیم مینجمنٹ اور سلیکشن کمیٹی کے درمیان جلد مشاورتی اجلاس متوقع ہے، اور ممکن ہے کہ جنوبی افریقا کے خلاف ٹیسٹ سیریز کے دوران وائٹ بال ٹیم کا تربیتی کیمپ لگایا جائے۔ اس کے لیے ممکنہ کھلاڑیوں کے نام جلد سامنے آئیں گے۔
ابتدائی اطلاعات کے مطابق دو سابق کپتانوں، بابر اعظم اور محمد رضوان کی قومی ٹی ٹوئنٹی ٹیم میں واپسی کا امکان نہ ہونے کے برابر ہے۔ ٹیم مینجمنٹ اور بورڈ کو کپتان سلمان علی آغا کی قیادت پر مکمل اعتماد ہے، اور وہ جنوبی افریقا کے خلاف سیریز میں نمبر تین پر بیٹنگ کریں گے۔
سلمان علی آغا اب تک 32 ٹی ٹوئنٹی میچوں میں 110.21 کے اسٹرائیک ریٹ سے 561 رنز بنا چکے ہیں، تاہم ایشیا کپ کے سات میچوں میں صرف 72 رنز بنانے پر انہیں تنقید کا سامنا کرنا پڑا۔ اس کے باوجود بورڈ اور کوچ مائیک ہیسن فی الحال کپتانی کی تبدیلی کے حق میں نہیں ہیں۔
ذرائع کے مطابق ایشیا کپ میں غیر مؤثر کارکردگی کے باوجود صائم ایوب پر وائٹ بال کرکٹ میں اعتماد برقرار رکھنے کا فیصلہ کیا گیا ہے، جبکہ وکٹ کیپر محمد حارث بھی ٹیم میں برقرار رہیں گے۔ تاہم فاسٹ بولنگ کے شعبے میں حارث روف کی جگہ دیگر بولرز کو موقع دینے پر غور کیا جا رہا ہے۔
کوچ مائیک ہیسن اور کپتان سلمان علی آغا اگرچہ ایشیا کپ فائنل میں شکست سے مایوس ہیں، لیکن دونوں اس بات پر متفق ہیں کہ موجودہ اسکواڈ کو مزید تسلسل کے ساتھ مواقع دیے جائیں۔ اطلاعات کے مطابق سابق کپتان بابر اعظم اور محمد رضوان کو جنوبی افریقا کے خلاف ٹی ٹوئنٹی سیریز میں شامل کیے جانے کے امکانات انتہائی کم ہیں۔
