قومی کرکٹ ٹیم کے سابق کپتان اور لیجنڈری فاسٹ بولر وسیم اکرم بھارت میں ہم نام شخص کی گرفتاری کی خبر میں اپنی تصویر چلانے پر میڈیا پر برہم ہو گئے۔
سوشل میڈیا پر جاری بیان میں وسیم اکرم نے کہا کہ وہ سب کو ایک مفت مشورہ دینا چاہتے ہیں کہ اگر سوشل میڈیا پر کسی اور شخص کا نام وسیم اکرم ہو تو معلومات شیئر کرنے سے پہلے اچھی طرح تصدیق کر لیا کریں۔
انہوں نے وضاحت کی کہ ہمسایہ ملک بھارت میں ایک شخص، جس کا نام بھی وسیم اکرم ہے، کو جاسوسی کے الزام میں گرفتار کیا گیا ہے، مگر نیوز چینلز اس خبر میں ان کی (سابق کرکٹر وسیم اکرم) تصویر استعمال کر رہے ہیں۔
وسیم اکرم نے طنزیہ انداز میں پنجابی میں کہا، ’’کون لوگ ہو تُسی، کِتھوں آئے ہو؟ کوئی چیک نہیں، کوئی بیلنس نہیں، الٹے سیدھے کمنٹس کر دیتے ہو بغیر دیکھے کہ وہ میرا اکاؤنٹ نہیں۔‘‘
انہوں نے مزید کہا کہ بلاوجہ اپنی جان پر عذاب نہ ڈالیں، ریلیکس رہیں اور خبر شیئر کرنے سے پہلے اچھی طرح چیک کر لیں۔
یاد رہے کہ بھارتی ریاست ہریانہ میں چند روز قبل پولیس نے وسیم اکرم نامی یوٹیوبر کو پاکستان کے لیے مبینہ جاسوسی کے الزام میں گرفتار کیا تھا۔
