نیشنل ڈیزاسٹر مینجمنٹ اتھارٹی (NDMA) نے ملک کے نشیبی اور سیلاب سے متاثرہ علاقوں میں ڈینگی اور ملیریا کے ممکنہ پھیلاؤ کے پیش نظر عوام کے لیے احتیاطی ہدایات جاری کر دی ہیں۔
NDMA کے ترجمان کے مطابق حالیہ شدید بارشوں اور سیلاب کے باعث جمع شدہ پانی مچھروں کی افزائش کا باعث بن رہا ہے، جو ڈینگی اور ملیریا جیسے خطرناک امراض کے پھیلاؤ کا سبب بن سکتا ہے۔
اتھارٹی نے عوام سے اپیل کی ہے کہ وہ احتیاطی تدابیر اختیار کریں، جن میں مچھر دانیوں اور ریپیلنٹ کے استعمال کے ساتھ ساتھ ماسک پہننا بھی شامل ہے۔ خاص طور پر وہ علاقے جہاں بارش کا پانی جمع ہو چکا ہے، وہاں خصوصی احتیاط برتی جائے۔
NDMA نے واضح کیا ہے کہ بیماری کی علامات ظاہر ہونے کی صورت میں، جیسے کہ بخار، جسم درد یا جلد پر دھبے، فوری طور پر قریبی اسپتال یا ڈاکٹر سے رجوع کریں اور خود علاج سے گریز کریں۔
اتھارٹی کی جانب سے جاری کردہ رہنما اصولوں کا مقصد ان بیماریوں کے پھیلاؤ کو روکنا ہے۔ NDMA نے سیلاب سے متاثرہ علاقوں میں تیزی سے بیماریوں کے پھیلنے پر تشویش کا اظہار کرتے ہوئے کہا ہے کہ بروقت اقدامات اور عوامی آگاہی کے ذریعے ہی ان خطرات پر قابو پایا جا سکتا ہے۔
