گلگت: وفاقی وزیر امور کشمیر و گلگت بلتستان اور مسلم لیگ (ن) خیبر پختونخوا کے صدر انجینئر امیر مقام سے مسلم لیگ (ن) خواتین ونگ گلگت بلتستان کے وفد نے سابق وزیراعلیٰ حافظ حفیظ الرحمان کی رہائشگاہ پر ملاقات کی۔
وفد میں صوبائی جنرل سیکریٹری ثروت صباء، سینئر نائب صدر آمنہ علی، ڈویژنل صدر بشریٰ پیر زادہ، اور سوشل میڈیا ایکٹوسٹ ایمان انصار شامل تھیں۔ ملاقات میں گلگت بلتستان کی سیاسی صورتحال، خواتین کے سیاسی کردار، اور پارٹی کو عوامی سطح پر مضبوط بنانے کے لیے حکمت عملی پر گفتگو کی گئی۔
خواتین وفد نے وفاقی وزیر کو گلگت بلتستان کے عوام، بالخصوص خواتین کو درپیش مسائل سے آگاہ کیا۔ امیر مقام نے خواتین ونگ کی سرگرمیوں کو سراہتے ہوئے مکمل تعاون کی یقین دہانی کرائی۔
انہوں نے کہا کہ قائد نواز شریف اور وزیراعظم شہباز شریف کے وژن کے مطابق پارٹی کو گراس روٹ لیول تک منظم اور مضبوط کیا جائے گا۔ ان کا کہنا تھا کہ سیاسی عمل میں خواتین کی بھرپور شرکت ناگزیر ہے اور مسلم لیگ (ن) ہر سطح پر خواتین کو بااختیار بنانے کے لیے پرعزم ہے۔
