ہنزہ و نگر کے سیلاب زدہ علاقوں کا اعلیٰ سطحی دورہ , متاثرین کی داد رسی، بحالی کے اقدامات کا جائزہ

گلگت بلتستان کے مختلف محکموں کے اعلیٰ حکام نے ہنزہ اور نگر کے سیلاب سے متاثرہ علاقوں کا تفصیلی دورہ کیا، جس میں سیکریٹری سیاحت ضمیر عباس، سیکریٹری اطلاعات دلدار احمد ملک، سیکریٹری خوراک صفدر خان، اور سیکریٹری واٹر مینجمنٹ اعظم خان شامل تھے۔ اس دورے میں ڈپٹی کمشنر ہنزہ، ضلعی انتظامیہ اور متعلقہ محکموں کے افسران بھی شریک تھے۔

وفد نے ہنزہ، گوجال، حسن آباد اور نگر کے متاثرہ علاقوں کا دورہ کیا اور سیلاب سے ہونے والے نقصانات، متاثرہ انفراسٹرکچر، اور جاری بحالی کے کاموں کا جائزہ لیا۔ مقامی کمیونٹی سے ملاقات کے دوران متاثرین نے اپنے مسائل حکام کے گوش گزار کیے، جن کے فوری حل کے لیے یقین دہانیاں کروائی گئیں۔

ڈپٹی کمشنر ہنزہ نظام الدین نے وفد کو موجودہ صورتحال پر تفصیلی بریفنگ دی اور بتایا کہ ضلعی انتظامیہ دستیاب وسائل کو بروئے کار لاتے ہوئے ریسکیو، ریلیف اور بحالی کی سرگرمیوں میں مصروف عمل ہے۔ امدادی کارروائیاں تیزی سے جاری ہیں تاکہ متاثرہ افراد کو بروقت سہولت فراہم کی جا سکے۔

سیکریٹری اطلاعات دلدار احمد ملک نے ڈپٹی کمشنر نظام الدین اور ان کی ٹیم کی کارکردگی کو سراہتے ہوئے کہا کہ وہ سیلابی صورتحال کے دوران مسلسل فیلڈ میں موجود رہے اور عوام کے ساتھ مل کر حالات کو خود مانیٹر کیا۔ انہوں نے کہا کہ ایسے افسران حقیقی معنوں میں عوامی خدمت کی مثال ہیں۔

سیکریٹری اطلاعات نے اس عزم کا اعادہ کیا کہ حکومت گلگت بلتستان متاثرہ عوام کو تنہا نہیں چھوڑے گی۔ تمام ادارے باہمی تعاون کے ساتھ امدادی سرگرمیوں میں مصروف ہیں اور متاثرہ علاقوں میں فوری و طویل مدتی بحالی کے لیے ہر ممکن وسائل بروئے کار لائے جا رہے ہیں۔