پاکستان میں سونے کی قیمت میں ایک بار پھر اضافہ ریکارڈ کیا گیا ہے۔ آل پاکستان جیمز اینڈ جیولرز ایسوسی ایشن کے مطابق آج کاروباری روز کے دوران فی تولہ سونا 1600 روپے مہنگا ہو کر 3 لاکھ 59 ہزار 700 روپے تک پہنچ گیا۔
اسی طرح 10 گرام سونے کی قیمت میں بھی 1371 روپے کا اضافہ ہوا، جس کے بعد اس کی نئی قیمت 3 لاکھ 8 ہزار 384 روپے ہو گئی۔ عالمی مارکیٹ میں بھی سونے کی قدر میں بہتری دیکھنے میں آئی اور فی اونس قیمت 16 ڈالر بڑھ کر 3372 ڈالر ہو گئی۔
روایتی طور پر سونا ایک محفوظ سرمایہ کاری تصور کیا جاتا ہے، خاص طور پر ایسے وقتوں میں جب افراط زر بڑھ رہا ہو یا سیاسی و معاشی حالات غیر مستحکم ہوں۔ یہی وجہ ہے کہ سرمایہ کار اکثر غیر یقینی حالات میں سونے کو ترجیح دیتے ہیں۔
یاد رہے کہ گزشتہ سال پاکستان میں سونے کی قیمت کے تعین کے طریقہ کار میں تبدیلی کی گئی تھی، جس کے تحت مقامی قیمت کو عالمی مارکیٹ ریٹ سے 20 ڈالر فی اونس زیادہ مقرر کرنے کا فیصلہ کیا گیا تھا۔ اس اقدام کا مقصد مقامی مارکیٹ کو عالمی رجحانات سے ہم آہنگ کرنا تھا۔
