گلگت: سیکریٹری اطلاعات گلگت بلتستان دلدار احمد ملک کی زیر صدارت محکمہ اطلاعات کا ایک اہم اجلاس منعقد ہوا، جس میں ڈپٹی ڈائریکٹر اطلاعات محمد سلیم خان نے ادارے کی کارکردگی، درپیش چیلنجز اور مستقبل کے لائحہ عمل پر تفصیلی بریفنگ دی۔ اجلاس میں مختلف شعبہ جات کے افسران نے شرکت کی۔
سیکریٹری اطلاعات دلدار احمد ملک نے محکمانہ نظم و ضبط، شفافیت، اور کارکردگی کو مزید بہتر بنانے کے لیے اہم فیصلے اور ہدایات جاری کیں۔ انہوں نے اشتہارات کی منصفانہ تقسیم، کرپشن کے خلاف زیرو ٹالرنس، اور دفتری امور میں کسی قسم کی کوتاہی نہ برتنے پر زور دیا۔
انہوں نے افسران و اہلکاروں کو دیانتداری، لگن اور پیشہ ورانہ مہارت کے ساتھ فرائض انجام دینے کی ہدایت کرتے ہوئے کہا کہ ادارے کی ساکھ کو بہتر بنانے کے لیے ہر فرد کا کردار اہم ہے۔ اس موقع پر انہوں نے صحافیوں کی فلاح و بہبود، میڈیا ہاؤسز سے موثر رابطہ کاری، اور میڈیا کے مسائل کے حل کے لیے مربوط پالیسی پر کام کرنے کے عزم کا اظہار بھی کیا۔
اجلاس میں فیصلہ کیا گیا کہ محکمہ اطلاعات کو جدید تقاضوں سے ہم آہنگ کیا جائے گا۔ ٹیکنالوجی کے مؤثر استعمال اور میڈیا سے بروقت رابطہ کاری کے لیے اقدامات کیے جائیں گے تاکہ عوام کو درست اور بروقت معلومات کی فراہمی ممکن ہو سکے۔
سیکریٹری اطلاعات نے کہا کہ محکمہ اطلاعات کو ایک فعال، شفاف اور عوام دوست ادارہ بنایا جا رہا ہے جو حکومت کی مؤثر ترجمانی کے ساتھ ساتھ صحافت کے بنیادی اصولوں کی پاسداری بھی یقینی بنائے گا۔ انہوں نے افسران و عملے کی محنت، سنجیدگی اور پیشہ ورانہ کارکردگی کو سراہا اور کہا کہ بہترین کارکردگی دکھانے والے اہلکار ادارے کا فخر ہیں۔
اجلاس کے دوران پاک-بھارت کشیدگی کے تناظر میں محکمہ اطلاعات میں قائم کیے گئے اسپیشل مانیٹرنگ اینڈ رپورٹنگ ڈیسک (SMRD) کی کارکردگی کو بھی خصوصی طور پر سراہا گیا۔ سیکریٹری اطلاعات نے کہا کہ اس ڈیسک پر تعینات افسران و اہلکاروں نے قومی ذمہ داری کے تحت دن رات کام کر کے معلومات کی بروقت مانیٹرنگ اور رپورٹنگ کو ممکن بنایا، جس سے مؤثر حکمت عملی کی تشکیل ممکن ہوئی۔
انہوں نے واضح کیا کہ ادارہ ایسے محنتی اور فرض شناس اہلکاروں کی خدمات کو نہ صرف سراہتا ہے بلکہ انہیں ادارے کا قیمتی اثاثہ تصور کرتا ہے۔ سیکریٹری اطلاعات نے اس عزم کا اظہار کیا کہ محکمے میں نظم و ضبط، معیار اور جوابدہی کو مزید بہتر بنایا جائے گا تاکہ ادارے کی کارکردگی کو نئی بلندیوں تک پہنچایا جا سکے۔
