راولپنڈی (نیوزڈیسک)پاکستان اور بنگلہ دیش کے درمیان 2 ٹیسٹ میچوں کی سیریز کا دوسرا میچ راولپنڈی اسٹیڈیم میں جاری ہے۔ دونوں ٹیموں کے درمیان یہ ٹیسٹ سیریز آئی سی سی ورلڈ ٹیسٹ چیمپیئنز شپ کا حصہ ہے۔
آج کھیل کے تیسرے دن بنگلہ دیش نے پاکستان کے 274 رنز کے جواب میں اپنی پہلی اننگز کا آغاز 10 رنز سے کیا لیکن بنگلہ دیشی بیٹنگ لائن شروع میں ہی لڑکھڑا گئی اور ان کے 26 رنز پر 6 کھلاڑی آؤٹ ہوگئے۔
بنگلہ دیشی اوپنر ذاکر حسن 16 گیندوں پر ایک رن بنا کر پاکستانی بولر خرم شہزاد کی بال پر ابرار احمد کے ہاتھوں کیچ آؤٹ ہوگئے۔ دیگر 2 بنگلہ دیشی بیٹرز بھی فاسٹ بولر خرم شہزاد کا شکار بنے۔ اوپنر شادمان اسلام 23 گیندوں پر 10 رنز بنا کر خرم شہزاد کی گیند پر بولڈ ہوئے۔
ون ڈاؤن آنے والے بنگلہ دیشی بیٹر نجم الحسین شانتو کو بھی خرم شہزاد نے بولڈ کیا، وہ 6 گیندوں پر 4 رنز بناسکے۔بنگلہ دیشی بیٹر مومن الحق کو 2 گیندوں پر ایک رن بنا کر امیر حمزہ کی گیند پر محمد علی کے ہاتھوں کیچ آؤٹ ہوئے۔
کل میچ کے دوسرے روز پاکستان کی پوری ٹیم 274 رنز بنا کر آؤٹ ہو گئی تھی جب کہ دوسرے روز کے اختتام تک بنگلہ دیش نے اپنی پہلی اننگز میں بغیر کسی نقصان کے 10 رنز بنائے تھے۔ پاکستان اور بنگلہ دیش کے درمیان دوسرے ٹیسٹ میچ کا پہلا روز بارش کی نذر ہو گیا تھا تاہم میچ کے دوسرے روز مہمان بنگلہ دیش کی ٹیم نے ٹاس جیت کر پاکستان کو پہلے بیٹنگ کی دعوت دی۔
مزیدپڑھیں:پاکستان شاہینز نے بنگلہ دیش اے کے خلاف پہلا ون ڈے 8 وکٹوں سے جیت لیا
راولپنڈی میں کھیلے گئے پہلے ٹیسٹ میں 10 وکٹوں سے شکست کے بعد پاکستان کے پاس 2 میچوں کی سیریز برابر کرنے کے لیے اب صرف 3 دن باقی رہ گئے ہیں جبکہ پاکستان کی پوری ٹیم پہلی اننگز میں محض 274 رنز بنا کر پویلین لوٹ گئی ہے۔
یاد رہے کہ دوسرے ٹیسٹ کے لیے سپنر ابرار احمد اور فاسٹ بولر میر حمزہ کو ٹیم میں شامل کیا گیا ہے جبکہ شاہین شاہ آفریدی کو میچ سے ڈراپ کر دیا گیا ہے۔ قومی ٹیم کے ٹیسٹ سکواڈ میں شان مسعود، سعود شکیل، ابرار احمد، محمد علی، سلمان علی آغا، صائم ایوب، بابر اعظم، میر حمزہ، محمد رضوان، عبداللہ شفیق اور خرم شہزاد شامل ہیں۔
