برطانیہ کے شہر شیفیلڈ میں بچوں اور ایک خاتون کے ساتھ تاریخی جنسی زیادتی کے مقدمے میں تین بھائیوں کو مجرم قرار دے دیا گیا ہے۔
41 سالہ عمار الیاس، جو شیفیلڈ کا رہائشی ہے اور متاثرین کے مطابق "کلر” کے نام سے جانا جاتا تھا، متعدد سنگین جنسی جرائم بشمول زیادتی کے واقعات میں قصوروار پایا گیا۔ متاثرین کے مطابق اس نے ایک متاثرہ کو کاٹا اور دیگر کو اسلحہ دکھا کر اور اجتماعی زیادتی کی دھمکیاں دے کر خوفزدہ کیا۔
اسلام آباد: فائیو جی اسپیکٹرم آکشن کے نتائج کا اعلان کردیا گیا
عمار الیاس کے بھائی 39 سالہ کمار الیاس اور 38 سالہ کامران الیاس کو بھی ایک لڑکی کے ساتھ پانچ جنسی جرائم میں مجرم قرار دیا گیا۔ یہ وہی لڑکی تھی جسے ان کے بڑے بھائی نے بھی زیادتی کا نشانہ بنایا تھا۔
یہ مقدمہ آپریشن اسٹوووڈ کی تحقیقات کا حصہ ہے، جو 1997 سے 2013 کے دوران روتھرم میں غیر خاندانی بچوں کے جنسی استحصال کے کیسز کی چھان بین کر رہا ہے۔ تحقیقات کے دوران 2018 میں ایک خاتون نے بتایا کہ 12 برس کی عمر سے کمار الیاس نے اسے بہلا پھسلا کر زیادتی کا نشانہ بنایا، اور 2004 سے 2008 کے درمیان عمار الیاس اور کامران الیاس نے بھی اسے جنسی تشدد کا نشانہ بنایا۔
تینوں بھائیوں کو جون 2020 میں گرفتار کیا گیا تھا جبکہ مارچ 2023 میں ان پر فرد جرم عائد کی گئی۔ کامران اور کمار الیاس کو حراست میں رکھا گیا ہے اور وہ 22 جون کو شیفیلڈ کراؤن کورٹ میں پیش ہوں گے جہاں انہیں سزا سنائی جائے گی۔
عمار الیاس غیر مشروط عدالتی ضمانت پر ہونے کے باوجود پاکستان فرار ہو گیا تھا اور اپنے ٹرائل میں پیش نہیں ہوا۔ عدالت نے اس کی غیر موجودگی میں مقدمہ چلایا اور 24 ستمبر کو اسے 20 جنسی جرائم اور خوف پھیلانے کی نیت سے اسلحہ رکھنے کے جرم میں مجرم قرار دیا۔ شیفیلڈ کراؤن کورٹ نے عمار الیاس کی گرفتاری کا وارنٹ جاری کر دیا ہے۔
