امریکی ریاست رہوڈ آئی لینڈ کے شہر پروویڈنس میں براؤن یونیورسٹی میں فائرنگ کے واقعے میں دو طلبہ ہلاک جبکہ نو زخمی ہوگئے۔ فائرنگ اس عمارت میں ہوئی جہاں فائنل امتحانات جاری تھے۔
پروویڈنس کے میئر بریٹ اسملی نے پریس کانفرنس میں بتایا کہ پولیس نے ایک مشتبہ شخص کو حراست میں لے لیا ہے، جس کے بعد کیمپس میں نافذ شیلٹر اِن پلیس کا حکم ختم کر دیا گیا۔ پولیس حکام کے مطابق کسی دوسرے مشتبہ شخص کی تلاش نہیں کی جا رہی۔
پاک بحریہ کا شمالی بحیرہ عرب میں جدید فضائی دفاعی میزائل کا کامیاب تجربہ
میئر کے مطابق زخمی ہونے والے نو افراد میں سے ایک کی حالت تشویشناک ہے، سات طلبہ کی حالت مستحکم ہے جبکہ ایک طالب علم کو اسپتال سے فارغ کر دیا گیا ہے۔
براؤن یونیورسٹی کی صدر کرسٹینا پیکسن نے بیان میں تصدیق کی کہ تمام متاثرین یونیورسٹی کے طالب علم تھے۔ ان کا کہنا تھا کہ یہ واقعہ یونیورسٹی کمیونٹی کے لیے نہایت افسوسناک اور صدمہ خیز ہے۔
عینی شاہدین کے مطابق فائرنگ کے بعد طلبہ میں شدید خوف و ہراس پھیل گیا اور کئی طلبہ نے جان بچانے کے لیے عمارتوں میں پناہ لی۔ واقعے کے بعد اتوار کو ہونے والے فائنل امتحانات ملتوی کر دیے گئے ہیں۔
امریکی صدر ڈونلڈ ٹرمپ نے واقعے پر افسوس کا اظہار کرتے ہوئے کہا کہ یہ ایک دل دہلا دینے والا سانحہ ہے اور متاثرین کے لیے دعا ہی کی جا سکتی ہے۔
