اسلام آباد میں آج مقبوضہ جموں و کشمیر پر بھارتی قبضے کے 77 سال مکمل ہونے پر یومِ سیاہ ملک بھر میں عقیدت و احترام کے ساتھ منایا جا رہا ہے۔ پاکستان، آزاد کشمیر، گلگت بلتستان اور دنیا بھر میں کشمیری عوام کے ساتھ اظہارِ یکجہتی کے لیے مختلف تقاریب، واکس، احتجاجی ریلیاں اور سیمینارز منعقد کیے جا رہے ہیں۔
ترکیے میں طلاق کا انوکھا معاہدہ
وفاقی دارالحکومت میں دفترِ خارجہ سے ڈی چوک تک مرکزی یکجہتی واک کا اہتمام کیا گیا ہے، جس میں مختلف وزارتوں کے نمائندوں، طلبہ، سول سوسائٹی اور شہریوں کی بڑی تعداد شریک ہے۔ شاہراہِ دستور، پارلیمنٹ ہاؤس اور ڈی چوک کو "کشمیر بنے گا پاکستان” کے بینرز اور پوسٹرز سے سجا دیا گیا ہے۔
وفاقی حکومت کی زیرِ نگرانی کشمیر میں بھارتی مظالم کو عالمی سطح پر اجاگر کرنے کی خصوصی مہم جاری ہے۔ وزارتِ اطلاعات، وزارتِ خارجہ، پی ٹی اے اور اسلام آباد پولیس کی جانب سے اس سلسلے میں مختلف انتظامات کیے گئے ہیں۔
کراچی، لاہور، پشاور، مظفرآباد اور گلگت میں بھی یومِ سیاہ کے موقع پر احتجاجی ریلیاں اور واکس نکالی جا رہی ہیں۔ صبح 10 بجے کشمیری شہداء کی یاد میں ایک منٹ کی خاموشی اختیار کی گئی۔
مقررین نے عالمی برادری سے اپیل کی ہے کہ وہ مقبوضہ کشمیر میں بھارتی مظالم اور انسانی حقوق کی سنگین خلاف ورزیوں کا نوٹس لے اور کشمیری عوام کو اُن کا حقِ خودارادیت دلانے میں کردار ادا کرے۔
تعلیمی اداروں میں بھی اس دن کی مناسبت سے خصوصی تقریبات کا انعقاد کیا جا رہا ہے جہاں طلبہ کشمیری عوام سے اظہارِ یکجہتی کرتے ہوئے آزادی کے عزم کو دہرا رہے ہیں۔ آج کا دن پوری پاکستانی قوم کے لیے کشمیری بھائیوں کے ساتھ رشتہِ ایمان، حوصلے اور عزم کی تجدید کا دن بن گیا ہے۔
