لوکی سے تیار کیا گیا جوس صحت کے لیے فائدہ مند سمجھا جاتا ہے اور آیوروید کے مطابق اسے جسم کو ٹھنڈک پہنچانے، معدے کی صحت بہتر بنانے، گرمی کی لُو سے بچانے اور پانی کی کمی دور کرنے والا مشروب قرار دیا جاتا ہے۔
ماہرین کے مطابق لوکی تقریباً 96 فیصد پانی پر مشتمل ہوتی ہے اور اس میں کیلوریز کم جبکہ فائبر، پوٹاشیئم اور وٹامن سی مناسب مقدار میں موجود ہوتے ہیں۔
غذائی ماہرین کے مطابق صبح نہار منہ لوکی کا تازہ جوس پینے سے جسم اسے تیزی سے جذب کر لیتا ہے، جس سے ہاضمہ بہتر ہوتا ہے اور معدے کو سکون ملتا ہے۔
لوکی کے جوس کے اہم فوائد درج ذیل ہیں:
ہاضمہ بہتر بنانا: فائبر اور پانی کی زیادہ مقدار قبض، تیزابیت اور اپھار میں کمی کے لیے مددگار ہو سکتی ہے۔
وزن کم کرنے میں مددگار: کم کیلوریز اور زیادہ فائبر کی وجہ سے پیٹ جلد بھرنے کا احساس ہوتا ہے، جس سے زیادہ کھانے سے بچاؤ ممکن ہوتا ہے۔
بلڈ پریشر متوازن رکھنا: پوٹاشیئم جسم میں سوڈیئم کی مقدار کو متوازن رکھنے میں کردار ادا کرتا ہے، جس سے بلڈ پریشر کنٹرول میں رہتا ہے۔
جسم کی صفائی: ماہرین کے مطابق یہ جگر اور گردوں کے افعال کو بہتر بنانے میں مدد دیتا ہے۔
جلد کے لیے فائدہ مند: وٹامن سی اور اینٹی آکسیڈنٹس جلد کی صحت اور نمی برقرار رکھنے میں مدد دیتے ہیں۔
ماہرین کے مطابق لوکی کا جوس صبح نہار منہ پینا زیادہ مفید سمجھا جاتا ہے کیونکہ اس وقت جسم کو پانی اور غذائیت کی ضرورت زیادہ ہوتی ہے۔ اس کے علاوہ دوپہر کے کھانے سے 20 تا 30 منٹ قبل بھی یہ پیا جا سکتا ہے۔
مناسب مقدار کے حوالے سے ماہرین کا کہنا ہے کہ ابتدا میں روزانہ 100 سے 200 ملی لیٹر جوس سے آغاز کریں اور زیادہ سے زیادہ مقدار 250 ملی لیٹر تک رکھی جائے۔ ابتدا میں ہفتے میں دو سے تین بار پینا بہتر ہے اور برداشت کے مطابق مقدار بڑھائی جا سکتی ہے۔
لوکی کا جوس فائدہ مند ہونے کے باوجود غلط استعمال کرنے پر نقصان دہ بھی ہو سکتا ہے۔ اگر لوکی کڑوی ہو تو اس کا جوس خطرناک ثابت ہو سکتا ہے، جس میں موجود زہریلا مادہ شدید الٹی، پیٹ درد اور اسہال کا سبب بن سکتا ہے۔ حد سے زیادہ جوس پینے سے معدے میں درد، متلی یا دست ہو سکتے ہیں۔
پوٹاشیئم کی زیادہ مقدار کی وجہ سے بلڈ پریشر مزید کم ہو سکتا ہے، اس لیے کم بلڈ پریشر والے افراد اسے احتیاط سے استعمال کریں۔
غذائی ماہرین مشورہ دیتے ہیں کہ لوکی کا جوس ہمیشہ تازہ اور میٹھی لوکی سے تیار کیا جائے، جبکہ حاملہ خواتین، بزرگ اور بچے اسے استعمال کرنے سے پہلے ڈاکٹر سے مشورہ کریں۔
نوٹ: یہ مضمون قارئین کی معلومات کے لیے شائع کیا گیا ہے، صحت سے متعلق امور میں اپنے معالج کے مشورے پر عمل کریں۔
