کراچی میں انسدادِ منشیات کی عدالت نے چاول برآمد کرنے کی آڑ میں ہیروئن اسمگل کرنے کے تین مقدمات میں فیصل آباد کے ایکسپورٹر علی اکبر مرزا کو مجموعی طور پر 64 سال قید کی سزا سنادی۔
عدالت نے اپنے فیصلے میں ملزم پر 25 لاکھ روپے جرمانہ بھی عائد کیا، جبکہ جرمانہ ادا نہ کرنے کی صورت میں اسے مزید 15 ماہ قید بھگتنا ہوگی۔
افغانستان کو بھی بھارت کی طرح منہ توڑ جواب دیا جائےگا، وفاقی وزیر داخلہ
فیصلے میں عدالت نے قرار دیا کہ ملزم رشوت کے الزام سے متعلق کوئی ٹھوس ثبوت پیش نہیں کر سکا۔ عدالت نے یہ بھی کہا کہ ہیروئن کا پاؤڈر حساس ہوتا ہے اور درجہ حرارت یا ماحول کی تبدیلی کے باعث اس کی شکل تبدیل ہوسکتی ہے۔
سماعت کے دوران ملزم نے مؤقف اختیار کیا کہ اے این ایف اہلکاروں نے رشوت طلب کی تھی، اور انکار پر اس کے خلاف جھوٹا مقدمہ بنایا گیا۔ وکیل صفائی نے کہا کہ برآمد شدہ منشیات ابتدا میں پاؤڈر کی شکل میں تھی لیکن عدالت میں چھوٹی بالز کی صورت میں پیش کی گئی، جبکہ ریکوری کے وقت نہ کوئی ویڈیو بنائی گئی اور نہ تصویر۔
پراسیکیوٹر عبدالحنان کے مطابق ملزم کنٹینروں میں ہیروئن چھپا کر دبئی بھجوا رہا تھا۔ اے این ایف نے خفیہ اطلاع پر فیصل آباد سے کارروائی کرتے ہوئے اسے گرفتار کیا۔ تفتیش کے دوران معلوم ہوا کہ اس نے دو کنٹینروں میں منشیات چھپا کر افریقہ بھی بھیجی تھی، جنہیں واپس منگوا کر قاسم انٹرنیشنل کنٹینر ٹرمینل پر لایا گیا۔
اے این ایف کے مطابق دونوں کنٹینروں سے 20 کلو ہیروئن برآمد ہوئی جو چاول کی بوریوں کے اندر تھیلیوں میں چھپائی گئی تھی۔ کیس میں حاجی محمد، بادشاہ خان، عباس لیاقت اور محمد سلیم کو مفرور قرار دیا گیا ہے۔
