نائب وزیراعظم و وزیر خارجہ سینیٹر محمد اسحاق ڈار نے مقامی ریفائنریوں میں تیار کیے جانے والے پٹرول میں ایتھنول کی آمیزش سے متعلق تجویز پر ایک اجلاس کی صدارت کی۔ جمعرات کو نائب وزیراعظم کے دفتر سے جاری بیان کے مطابق چیئرمین اوگرا نے اجلاس کو اس تجویز پر بریفنگ دی۔
نیشنل سیکیورٹی ورکشاپ بلوچستان کے وفد کی گورنر اور کور کمانڈر پشاور سے اہم ملاقات
تفصیلی غور و خوض کے بعد کمیٹی نے سفارش کی کہ چونکہ اس وقت ایتھنول کی قیمتیں پٹرول کے مقابلے میں زیادہ ہیں، اس لیے ریفائنریوں اور ایتھنول تیار کرنے والی صنعت کے لیے مالی طور پر قابل عمل ہونے کی شرط کے ساتھ ایتھنول کی رضاکارانہ آمیزش کی پالیسی اختیار کی جائے۔
اوگرا کو ہدایت کی گئی کہ وہ ایتھنول کی برآمدات اور مقامی طور پر تیار کیے جانے والے پٹرول میں اس کی آمیزش کے مالی پہلوئوں کا سہ ماہی بنیادوں پر جائزہ لے اور اپنی رپورٹ پٹرولیم ڈویژن کے ذریعے وزیراعظم آفس کو پیش کرے۔ اجلاس میں وزیراعظم کے معاون خصوصی طارق باجوہ، سیکریٹری پٹرولیم، سیکریٹری صنعت و پیداوار، چیئرمین اوگرا، پاکستان ایتھنول مینوفیکچررز ایسوسی ایشن اور پاکستان آٹو موٹو مینوفیکچررز ایسوسی ایشن کے نمائندوں نے شرکت کی۔
