آسٹریلیا کے نامور ٹیسٹ کرکٹر عثمان خواجہ نے انٹرنیشنل کرکٹ سے ریٹائرمنٹ کا اعلان کر دیا ہے، وہ ایشیز سیریز کے دوران سڈنی کرکٹ گراؤنڈ میں کھیلے جانے والے پنک ٹیسٹ کے بعد ٹیسٹ کرکٹ کو خیرباد کہہ دیں گے۔ سڈنی کرکٹ گراؤنڈ سے ہی فرسٹ کلاس کرکٹ کا آغاز کرنے والے عثمان خواجہ اپنا 88 واں ٹیسٹ میچ کھیل کر ریٹائر ہوں گے۔ 39 سالہ عثمان خواجہ نے 2011 میں آسٹریلیا کی جانب سے ٹیسٹ ڈیبیو کیا اور اپنے 15 سالہ طویل کیریئر میں 6 ہزار سے زائد رنز اسکور کیے۔ کرکٹ آسٹریلیا کے مطابق عثمان خواجہ نے میدان سے باہر بھی نمایاں خدمات انجام دیں اور عثمان خواجہ فاؤنڈیشن کے ذریعے ایک مثبت میراث قائم کی، وہ آسٹریلیا کے پہلے پاکستان میں پیدا ہونے والے اور پہلے مسلمان ٹیسٹ کرکٹر ہیں۔
وزیراعظم کی تیل وگیس سپلائی چین کوترجیحی بنیادوں پر ڈیجیٹائزکرنے کی ہدایت
عثمان خواجہ کو ان کی شاندار کارکردگی پر 2023 میں آئی سی سی ٹیسٹ کرکٹر آف دی ایئر اور شین وارن ٹیسٹ کرکٹر آف دی ایئر کے اعزازات سے نوازا گیا، وہ اسی سال آئی سی سی ٹیسٹ چیمپئن شپ جیتنے والی آسٹریلوی ٹیم کا بھی حصہ تھے۔ ریٹائرمنٹ پر اظہارِ خیال کرتے ہوئے عثمان خواجہ نے کہا کہ انہیں سب سے زیادہ احساسِ قناعت حاصل ہے اور وہ خود کو خوش قسمت سمجھتے ہیں کہ انہوں نے آسٹریلیا کی نمائندگی کرتے ہوئے اتنے زیادہ میچز کھیلے، جبکہ سری لنکا کے خلاف انہوں نے ڈبل سنچری بنا کر ایک اہم ریکارڈ بھی اپنے نام کیا تھا۔ ان کا کہنا تھا کہ انہیں امید ہے کہ ان کا سفر دوسروں کے لیے باعثِ تحریک ثابت ہوا ہوگا۔
کرکٹ آسٹریلیا کے سی ای او ٹوڈ گرین برگ نے عثمان خواجہ کی خدمات کو سراہتے ہوئے کہا کہ انہوں نے اپنی غیر معمولی کارکردگی سے آسٹریلوی کرکٹ میں اہم کردار ادا کیا اور اپنی فاؤنڈیشن کے ذریعے ایک مثبت شناخت قائم کی۔ انہوں نے مزید کہا کہ عثمان خواجہ کا شمار آسٹریلیا کے اسٹائلش اور شاندار بیٹرز میں ہوتا ہے اور کرکٹ آسٹریلیا ان کی خدمات پر شکر گزار ہے۔ واضح رہے کہ عثمان خواجہ اب تک 87 ٹیسٹ، 40 ون ڈے اور 9 ٹی ٹوئنٹی انٹرنیشنل میچز کھیل چکے ہیں، جبکہ ایشیز سیریز کا آخری ٹیسٹ 4 جنوری سے سڈنی کرکٹ گراؤنڈ میں شروع ہوگا۔
