**بلاول بھٹو زرداری کا اپیل: سیاسی تقسیم ختم کرکے ملک کو معاشی بحران سے نکالیں**
پیپلز پارٹی کے چیئرمین بلاول بھٹو زرداری نے بینظیر بھٹو کی اٹھارویں برسی کے موقع پر گڑھی خدا بخش میں ہونے والے جلسے سے خطاب کرتے ہوئے سیاسی مفاہمت اور قومی یکجہتی کی اہمیت پر زور دیا۔ انہوں نے کہا کہ ملک کو موجودہ سیاسی بحران سے نکالنے کے لیے آج نہیں تو کل مفاہمت کی ضرورت ہوگی۔
بھارت کےمزید جہاز گراسکتے تھے لیکن ہم نےتھوڑا رحم کیا پھر سے جنگ مسلط کی تو ہم تیار ہیں: صدر مملکت
بلاول بھٹو نے کہا کہ بینظیر بھٹو کا آخری پیغام مفاہمت کا تھا اور انہوں نے اپنی آخری کتاب بھی اسی موضوع پر لکھی تھی۔ انہوں نے زور دیا کہ سیاسی جماعتوں کو انتہاپسندی ترک کر کے سیاست کو اس کے صحیح دائرے میں واپس لانا ہوگا۔
انہوں نے 9 مئی کے واقعات کا حوالہ دیتے ہوئے کہا کہ "اداروں کو گالیاں دینا یا فوجی تنصیبات پر حملے کرنا سیاست کے دائرے میں نہیں آتے۔” بلاول نے کہا کہ اگر نیشنل اکاؤنٹیبلٹی بیورو انہیں نوٹس دے یا صدر زرداری کو گرفتار کرے، تو کیا پیپلز پارٹی دفاعی تنصیبات پر حملہ کرتی؟ انہوں نے کہا کہ ان کے خاندان پر سخت ترین مظالم ڈھائے گئے، لیکن انہوں نے ہمیشہ سیاست کے دائرے میں رہتے ہوئے جمہوری جدوجہد کی۔
بلاول نے صدر آصف علی زرداری کی قیادت کو سراہتے ہوئے کہا کہ بینظیر بھٹو کی شہادت کے بعد پورے ملک میں غم و غصہ پھیل گیا تھا، لیکن صدر زرداری نے "پاکستان کھپے” کا نعرہ لگا کر ملک کو مزید انتشار سے بچایا، جمہوریت کو بچایا، اور آمریت کا خاتمہ کیا۔
انہوں نے موجودہ سیاسی تقسیم پر تشویش کا اظہار کرتے ہوئے کہا کہ اس سے ملک کی سیاست، جمہوریت، معیشت اور قومی سلامتی سب متاثر ہو رہے ہیں۔ بلاول نے کہا کہ اگر ملک کو معاشی بحران سے نکالنا ہے تو پہلے سیاسی بحران کو حل کرنا ہوگا۔
انہوں نے صدر زرداری کو "مفاہمت کا بادشاہ” قرار دیتے ہوئے کہا کہ وہی وہ واحد شخص ہیں جو پاکستان کی سیاست سے سیاسی تقسیم ختم کر سکتے ہیں۔ بلاول نے کہا کہ مئی 2019 کی جنگ کے دوران پاکستان متحد ہو گیا تھا اور بھارت کو تاریخی جواب دیا تھا، آج بھی اسی اتحاد کی ضرورت ہے۔
انہوں نے وزیراعظم شہباز شریف کا شکریہ ادا کیا کہ انہوں نے سیلاب متاثرین کے حوالے سے پیپلز پارٹی کی تجویز قبول کی اور زرعی ایمرجنسی نافذ کی۔ بلاول نے فیلڈ مارشل عاصم منیر کی قیادت کو خراج تحسین پیش کرتے ہوئے کہا کہ "ہمارے فیلڈ مارشل کا نام سن کر ہی مودی چھپ جاتا ہے۔” انہوں نے دعویٰ کیا کہ صدر زرداری ہی تھے جنہوں نے چین سے وہ جنگی جہاز منگوائے تھے جن کے ذریعے بھارت کے چھ جہاز گرائے گئے تھے۔
