پاکستان تحریک انصاف (پی ٹی آئی) کے سیکریٹری جنرل سلمان اکرم راجا نے تصدیق کی ہے کہ علی امین گنڈا پور کو خیبر پختونخوا کی وزارتِ اعلیٰ سے ہٹا دیا گیا ہے اور ان کی جگہ سہیل آفریدی کو صوبے کا نیا وزیر اعلیٰ نامزد کیا گیا ہے۔
بشریٰ بی بی کے وکیل رائے سلیمان نے بھی علی امین گنڈا پور کو ہٹائے جانے کی تصدیق کی ہے۔
دوسری جانب علی امین گنڈا پور نے کہا ہے کہ انہیں اب تک وزارتِ اعلیٰ چھوڑنے سے متعلق کوئی باضابطہ اطلاع نہیں ملی۔ ان کا کہنا تھا کہ وزارتِ اعلیٰ پارٹی اور عمران خان کی امانت ہے، اور جب وہ کہیں گے تو وہ فوراً یہ عہدہ چھوڑ دیں گے۔
*سہیل آفریدی کون ہیں؟*
خیبر پختونخوا کے متوقع وزیر اعلیٰ سہیل آفریدی کا تعلق ضلع خیبر سے ہے۔ وہ 2024 کے عام انتخابات میں پہلی مرتبہ ضلع خیبر سے رکنِ صوبائی اسمبلی منتخب ہوئے۔
سہیل آفریدی ماضی میں انصاف اسٹوڈنٹس فیڈریشن (آئی ایس ایف) خیبر پختونخوا کے صدر بھی رہ چکے ہیں۔ موجودہ حکومت میں وہ وزیراعلیٰ کے معاونِ خصوصی برائے کمیونی کیشن اینڈ ورکس کے عہدے پر فائز رہے، بعد ازاں صوبائی کابینہ میں ردوبدل کے بعد انہیں وزیر برائے ہائر ایجوکیشن بنایا گیا۔
سہیل آفریدی پاکستان تحریک انصاف کی مرکزی ایگزیکٹو کمیٹی کے رکن بھی ہیں۔
