وفاقی وزیر امیر مقام کی دنیور منوگاہ سانحے کے شہداء کے لواحقین سے ملاقات، 20 لاکھ روپے معاوضے کا اعلان

وفاقی وزیر امور کشمیر و گلگت بلتستان انجینئر امیر مقام نے گلگت کے علاقے دنیور میں حالیہ منوگاہ سانحے میں جاں بحق ہونے والے افراد کے لواحقین سے ملاقات کی، تعزیت کی اور مرحومین کے ایصالِ ثواب کے لیے فاتحہ خوانی کی۔ اس موقع پر انہوں نے کہا کہ دنیور سانحے میں جان دینے والے رضاکاروں کی قربانی کو ہمیشہ یاد رکھا جائے گا۔

انہوں نے رضاکاروں کو خراجِ تحسین پیش کرتے ہوئے کہا کہ گلگت بلتستان کے عوام ملک کے سرحدی محافظ ہیں، اور ان کی قربانیاں پاکستان کے لیے باعث فخر ہیں۔

وفاقی وزیر نے بتایا کہ وزیراعظم شہباز شریف خود گلگت بلتستان میں سیلابی صورتحال کی نگرانی کر رہے ہیں اور شہداء کے لواحقین کو وفاقی حکومت کی جانب سے فی کس 20 لاکھ روپے دیے جائیں گے۔ زخمیوں کے علاج کے لیے تمام وسائل فراہم کیے جائیں گے، اور ان کی خدمات کے اعتراف میں ایوارڈ بھی دیے جائیں گے۔

انہوں نے یہ بھی اعلان کیا کہ شہداء کی یاد کو زندہ رکھنے کے لیے ان کے نام پر یادگار یا سینٹر قائم کیا جائے گا تاکہ ان کی قربانی کو آنے والی نسلیں بھی یاد رکھ سکیں۔