نیشنل ڈیٹا بیس اینڈ رجسٹریشن اتھارٹی (نادرا) کی جانب سے 2 اور 3 اگست 2025 کو برطانیہ کے مختلف بڑے شہروں میں موبائل رجسٹریشن ڈرائیو کا انعقاد کیا جائے گا۔
اس اقدام کا مقصد بیرونِ ملک مقیم پاکستانیوں کو ان کی شناختی دستاویزات سے متعلق سہولیات اُن کے قریب فراہم کرنا ہے۔ نادرا کی موبائل رجسٹریشن وینز برٹن آن ٹرینٹ (برمنگھم)، مڈلزبرو (بریڈ فورڈ) اور بیلفاسٹ (مانچسٹر) میں دستیاب ہوں گی تاکہ وہاں موجود پاکستانی کمیونٹی کو خدمات فراہم کی جا سکیں۔
یہ وینز کمپیوٹرائزڈ قومی شناختی کارڈز (CNICs)، بیرون ملک پاکستانیوں کے لیے قومی شناختی کارڈز (NICOP)، اور فیملی رجسٹریشن سرٹیفکیٹس (FRCs) کے اجرا اور تجدید کی سہولت فراہم کریں گی۔
نادرا نے برطانیہ میں مقیم پاکستانیوں کو مشورہ دیا ہے کہ وہ رجسٹریشن کے وقت اپنا پرانا CNIC یا B-Form ساتھ لائیں تاکہ عمل تیزی سے مکمل ہو سکے۔ خواتین کی سہولت اور آرام دہ ماحول کو مدنظر رکھتے ہوئے علیحدہ کاؤنٹرز اور خواتین عملہ کی بھی دستیابی یقینی بنائی گئی ہے۔
یہ موبائل رجسٹریشن ڈرائیو نادرا کی اس حکمت عملی کا حصہ ہے جس کا مقصد بیرون ملک پاکستانیوں کے لیے شناختی خدمات تک رسائی کو آسان اور مؤثر بنانا ہے، خصوصاً اُن افراد کے لیے جو مستقل رجسٹریشن مراکز تک نہیں جا سکتے۔
اس کے ساتھ ساتھ نادرا کی "پاک آئی ڈی” موبائل ایپ بھی شہریوں کو آن لائن سہولیات فراہم کر رہی ہے، جس کے ذریعے شناختی کارڈ کی تجدید، فیملی رجسٹریشن سرٹیفکیٹ، پیدائش، موت اور ازدواجی حیثیت کے اندراج جیسے امور بآسانی انجام دیے جا سکتے ہیں۔
