لاہور(نیوزڈیسک)لاہور ہائی کورٹ نے سربراہ سنی اتحاد کونسل حامد رضا کی مخصوص نشستوں پر الیکشن کمیشن کے نئے شیڈول پر حکمِ امتناع کی استدعا مسترد کر دی۔
جسٹس چوہدری محمد اقبال نے صاحبزادہ حامد رضا کی مخصوص نشستیں نہ ملنے کے خلاف دائر درخواست پر سماعت کی۔
لاہور ہائی کورٹ نے وفاقی حکومت اور پنجاب حکومت کو تحریری جواب جمع کرانے کی مہلت دے دی۔
عدالت نے ایڈووکیٹ جنرل پنجاب سے سوال کیا کہ کیا درخواست میں پنجاب حکومت کا جواب آیا ہے؟
ایڈووکیٹ جنرل پنجاب نے استدعا کی کہ ہمیں جواب دینے کے لیے مہلت دی جائے، مخصوص نشستوں پر کچھ ارکان نے حلف اٹھا لیا ہے، دیگر نشستوں کی حد تک ہم جواب فائل کر دیں گے۔
درخواست گزار حامد رضا کے وکیل نے اس موقع پر استدعا کی کہ یہ معاملہ اہم نوعیت کا ہے، اس پر حکمِ امتناع دیا جائے ۔
جسٹس چوہدری محمد اقبال نے کہا کہ جواب آنے دیں، دیکھ لیتے ہیں۔
اس کے ساتھ ہی عدالت نے سربراہ سنی اتحاد کونسل کی مخصوص نشستوں کے لیے الیکشن کمیشن کے نئے شیڈول پر حکمِ امتناع کی استدعا مسترد کر دی۔
