کراچی(نیوزڈیسک)امیر جماعت اسلامی حافظ نعیم الرحٰمن نے کہا ہے کہ مہنگائی کے خلاف جماعت اسلامی آج ملک گیر احتجاج کر رہی ہے، اس دوران تمام چھوٹے اور بڑے شہروں میں دھرنے ہوں گے۔
حافظ نعیم الرحمن نے ایک بیان میں کہا ہے کہ بجلی ٹیرف میں بے تحاشا اضافے اور ظالمانہ ٹیکسز کے خلاف اسلام آباد میں 26 جولائی کو دھرنا دیا جائےگا اور مطالبات کی منظوری تک وہاں سے نہیں اٹھیں گے۔
انہوں نے کہا کہ دھرنے تک عوامی موبلائزیشن جاری رہی گی، اب حکومت کو بجلی کے بھاری بلوں وظالمانہ سلیب سسٹم پر عوام کو ریلیف دینا ہوگا۔
حافظ نعیم الرحٰمن کا کہنا تھاکہ حکمران آئی ایم ایف کے حکم پر بجلی بلوں میں اضافہ کر رہے ہیں، حکمران اشرافیہ ظالمانہ ٹیکس اور پیٹرول کی قیمتوں میں بھی ہوشربا اضافہ کررہی ہے۔
انہوں نے کہا کہ عوام دشمن اقدامات کے خلاف ’حق دو عوام کو‘ تحریک چلارہے ہیں، 26 جولائی کے پرامن دھرنے میں سب کو شرکت کی دعوت دیتا ہوں۔
امیر جماعت اسلامی نے مزید کہا کہ عدالت کے فیصلے کے بعد الیکشن کمیشن کی کوئی اخلاقی حیثیت باقی نہیں رہی اور چیف الیکشن کمشنر فوری طورپر استعفیٰ دیں۔
واضح رہے کہ یکم جولائی کو جماعت اسلامی نے بجلی و پیٹرول کی قیمت میں اضافے کے خلاف 12 جولائی کو اسلام آباد میں دھرنا دینے کا اعلان کیا تھا، جو 26 جولائی تک موخر کردیا گیا تھا۔
