مکہ مکرمہ (نیوزڈیسک)مکہ اور جدہ کے درمیان 62 کلو میٹر نئی شاہراہ کے 11 کلومیٹر طویل چوتھے مرحلے کا 24 فیصد کام مکمل کر لیا گیا ہے۔ اردو نیوز نے سعودی عرب کی روڈز جنرل اتھارٹی کے حوالے سے بتایا کہ نئی شاہراہ کی تکمیل کے بعد اس کے ذریعے جدہ ایئرپورٹ سے مکہ تک کا سفر صرف 35 منٹ میں طے کیا جاسکے گا۔ نئی شاہراہ پر گاڑیوں کے لیے 4 ٹریک ہیں۔
یہ جدہ کے کنگ عبدالعزیز انٹرنیشنل ایئرپورٹ سے براہ راست مکہ مکرمہ جاتی ہے۔ شاہراہ کے منصوبے کو 4 مراحل میں تقسیم کیا گیا تھا۔ تین مراحل مکمل ہونے کے بعد اسے ٹریفک کے کھول دیا گیا ہے جس کی لمبائی 51 کلو میٹرہے۔ اس منصوبے کا مقصد الحرمین روڈ اور جدہ مکہ روڈ پر ٹریفک کے رش کو کم کرنا اور جدہ کے اندر ٹریفک کے بہائو کو بہتر بنانا ہے۔ نئی شاہراہ کی لمبائی 62 کلو میٹر ہے جو جدہ ایئرپورٹ النزھہ ڈسٹرکٹ کے چوراہے سے شروع ہوکر مکہ مکرمہ کی چوتھی رنگ روڈ سے ملتی ہے۔
یہ منصوبہ زائرین حرم کی خدمت اور جدہ کے مشرق اور مکہ کے شمال میں نئے رہائشی علاقوں اور محلوں سے سفر کرنے والوں کو سہولت فراہم کرے گا اور سعودی وژن 2030 کے ہدف کو پورا کرنے میں مدد گار ثابت ہو گا۔
