کراچی، 04 فروری 2025: کثیرالقومی بحری مشق امن 2025 اور پہلے امن ڈائیلاگ کی میڈیا بریف کراچی میں منعقد ہوئی۔ کمانڈر پاکستان فلیٹ، ریئر ایڈمرل عبدالمنیب نے 7 سے 11 فروری تک کراچی میں ہونے والی مشق اور امن ڈائیلاگ کی تفصیلات سے میڈیا کو آگاہ کیا۔
کمانڈر پاکستان فلیٹ نے میڈیا کے نمائندوں سے بات کرتے ہوئے کہا کہ عالمی جغرافیائی سیاست سے جیو اکنامکس کی جانب بدلتی صورتحال میں سمندری تجارت اور توانائی کے راستوں کی سیکیورٹی انتہائی اہمیت اختیار کر گئی ہے۔ بحر ہند کے خطے کو مختلف روایتی اور غیر روایتی چیلنجز کا سامنا ہے، جس کے باعث میری ٹائم سیکورٹی کے دائرہ کار کو مزید وسیع کیا گیا ہے اور تمام ممالک کو اپنی حکمت عملی پر نظر ثانی کرنے کی ضرورت محسوس ہوئی ہے۔ انہوں نے کہا کہ پاکستان تسلیم کرتا ہے کہ کوئی بھی ملک اکیلا سمندری چیلنجز کا مقابلہ نہیں کر سکتا۔ اسی لیے پاک بحریہ نے 2007 میں "Together for Peace” کے نعرے کے تحت کثیر القومی مشق امن کا آغاز کیا۔
کمانڈر پاکستان فلیٹ نے بتایا کہ مشق امن کا مقصد مختلف بحری ممالک کو ایک مشترکہ پلیٹ فارم پر لانا ہے تاکہ عالمی سطح پر محفوظ اور پائیدار طریقے اپنائے جا سکیں اور بحری خطرات کا اجتماعی طور پر مقابلہ کیا جا سکے۔ اس مشق کا دائرہ اور مقاصد وقت کے ساتھ وسیع ہوئے ہیں، اور اب اس میں 60 سے زائد ممالک اپنے بحری جہازوں، فضائی جہازوں، اسپیشل آپریشن فورسز اور میرینز کے ساتھ حصہ لے رہے ہیں۔
مشق امن 2025 میں دو اہم مراحل شامل ہیں: ہاربر فیز (7 سے 9 فروری تک)، جس میں سیمینارز، مباحثے، آپریشنل مظاہرے اور ثقافتی اجتماعات ہوں گے، اور سی فیز (10 سے 11 فروری تک) جس میں بحری حکمت عملی، انسداد بحری قزاقی اور دہشت گردی کی مشقیں، سرچ اینڈ ریسکیو آپریشنز، لائیو فائرنگ اور بین الاقوامی فلیٹ ریویو شامل ہوں گے۔
کمانڈر پاکستان فلیٹ نے اس بات پر زور دیا کہ امن مشق میں بڑھتی ہوئی عالمی شرکت پاکستان کی بحریہ کے عالمی میری ٹائم سیکیورٹی میں اہم کردار کو تسلیم کرنے کا مظہر ہے۔ اس مشق کے دوران، پاکستان نے پہلی بار "امن ڈائیلاگ” کا آغاز بھی کیا ہے، جو بحری سربراہان، کوسٹ گارڈز اور دفاعی افواج کو عالمی اور علاقائی سمندری مسائل پر تبادلہ خیال کرنے کا موقع فراہم کرے گا۔
کمانڈر نے مزید کہا کہ مشق امن 2025 پاکستان کے میری ٹائم سیکیورٹی میں اہم کردار کو اجاگر کرے گی اور اس سے پاکستان کی سمندری تجارتی راستوں اور اقتصادی مفادات کی حفاظت کے حوالے سے بھرپور صلاحیت کا اظہار ہوگا۔
ڈائریکٹر جنرل پبلک ریلیشنز (نیوی)
