پریس ریلیز کے مطابق سنٹر فار ایرو اسپیس اینڈ سکیورٹی اسٹڈیز (کَیس) لاہور نے 30 اپریل 2026 کو “فضائی طاقت اور تنازعات کی بدلتی ہوئی نوعیت” کے عنوان سے ایک سیمینار منعقد کیا، جس میں ماہرینِ تعلیم، دانشوروں، سینئر افسران اور متعلقہ شعبوں کے ماہرین نے شرکت کی۔ تقریب کا افتتاح محترمہ ندأ شاہد، ایسوسی ایٹ ڈائریکٹر کَیس لاہور نے کیا۔
سیمینار سے خطاب کرتے ہوئے پاکستان انسٹیٹیوٹ فار پیس اسٹڈیز اسلام آباد کے صدر عامر رانا نے غیر ریاستی ڈرون جنگ کے عالمی ارتقا پر روشنی ڈالی اور کہا کہ یہ ابتدائی تجربات سے ترقی کرتے ہوئے آج ایک جدید شکل اختیار کر چکی ہے۔ انہوں نے کہا کہ مختلف محاذوں پر سرگرم مسلح گروہ ان نظاموں کو نگرانی، دباؤ ڈالنے اور حملہ آور کارروائیوں کے لیے مسلسل استعمال کر رہے ہیں۔ ان کے مطابق پاکستان بھی اس رجحان کا حصہ بنتا جا رہا ہے، جہاں مسلح کواڈ کاپٹرز وقتی اور محدود واقعات سے نکل کر جغرافیائی طور پر پھیلے ہوئے اور معمول کے ہتھیار کے طور پر غیر ریاستی عناصر کے زیر استعمال آ رہے ہیں، جس سے کشیدگی میں اضافے کے خدشات پیدا ہو رہے ہیں اور اس کے لیے مربوط ردعمل ضروری ہے۔
ایئر وائس مارشل طارق غازی، ڈی جی پروجیکٹس ایئر ہیڈکوارٹرز نے اپنے خطاب میں کہا کہ جدید روایتی جنگ میں کامیابی اور زمینی و بحری محاذوں پر نقل و حرکت کی آزادی کے لیے فضائی طاقت بنیادی حیثیت رکھتی ہے۔ انہوں نے وضاحت کی کہ موجودہ تنازعات پلیٹ فارم پر مبنی کارروائیوں سے ہٹ کر نیٹ ورک پر مبنی، کثیر سطحی اور اثر پر مبنی جنگی ڈھانچے کی جانب منتقل ہو چکے ہیں، جہاں انسانی عملے کے حامل طیارے، بغیر پائلٹ کے نظام اور درست نشانہ بنانے والے میزائل ایک مربوط نظام کے طور پر کام کرتے ہیں۔ انہوں نے مزید کہا کہ خلا، سائبر اور الیکٹرو میگنیٹک اسپیکٹرم اس ماحول میں فیصلہ کن عناصر بنتے جا رہے ہیں، اور اب کامیابی انفرادی پلیٹ فارمز کی برتری کے بجائے نظاموں کے مؤثر انضمام پر منحصر ہے، جہاں فضائی طاقت تنازع کی رفتار، گہرائی اور نتائج کو تشکیل دیتی ہے۔
بریگیڈیئر ظاہر کاظمی (ر)، مشیر آرمز کنٹرول اسٹریٹیجک پلانز ڈویژن نے اپنے تجزیے میں بتایا کہ دوہری صلاحیت کے حامل میزائل، ہائپرسانک نظام اور کم ہوتے فیصلہ سازی کے اوقات جنوبی ایشیا میں جوہری اشارہ رسانی اور کشیدگی کے خطرات کو متاثر کر رہے ہیں۔ انہوں نے حالیہ تنازعات سے حاصل ہونے والے اسباق کی روشنی میں کہا کہ اب فتح کا انحصار انفرادی پلیٹ فارمز کے بجائے ایک مربوط نظامی ڈھانچے پر ہے۔ انہوں نے خبردار کیا کہ ہتھیاروں کی نوعیت اور ارادوں سے متعلق بڑھتی ہوئی ابہام روایتی اور جوہری اشارہ رسانی کے درمیان حد بندی کو دھندلا رہا ہے، خاص طور پر جنوبی ایشیا میں، اور اس بات پر زور دیا کہ فضائی حدود اب وہ براہ راست راستہ بن چکی ہے جہاں ٹیکٹیکل کارروائیاں اسٹریٹیجک نتائج میں تبدیل ہو سکتی ہیں، اس لیے مؤثر کمانڈ اینڈ کنٹرول اور واضح اشارہ رسانی استحکام کے لیے ناگزیر ہیں۔
اپنے اختتامی کلمات میں ایئر مارشل عاصم سلیمان (ر)، صدر کَیس لاہور نے کہا کہ جنگ کی نوعیت تیزی سے تبدیل ہو رہی ہے اور فضائی میدان وہ بنیادی دائرہ بن چکا ہے جہاں ٹیکٹیکل اقدامات عملیاتی اور اسٹریٹیجک نتائج پیدا کرتے ہیں۔ انہوں نے کہا کہ ڈرونز، اسمارٹ ہتھیاروں اور براہِ راست نگرانی میں ترقی نے نشاندہی، فیصلہ سازی اور حملے کے درمیان فاصلے کو کم کر دیا ہے، جبکہ فضائی، سائبر، خلا اور الیکٹرانک جنگ کے مابین کثیر جہتی آپریشنز کا انضمام اب ناگزیر ہو چکا ہے۔ انہوں نے حالیہ تنازعات، بشمول مئی 2025 کی پاک بھارت جنگ، کا حوالہ دیتے ہوئے کہا کہ صرف تعداد اور جدید ٹیکنالوجی ایک منظم اور ہم آہنگ مہم کو شکست نہیں دے سکتی، جیسا کہ پاکستان ایئر فورس نے ایئر چیف مارشل ظہیر احمد بابر سدھو کی قیادت میں انجام دیا۔ ان کے مطابق کامیابی کی بنیاد مضبوط ڈاکٹرائن، کثیر جہتی آپریشنز اور مؤثر ایسکلیشن مینیجمنٹ نظام میں مضمر ہے۔
سیمینار کا اختتام ایک متعامل سوال و جواب کے سیشن پر ہوا، جس میں تنازعات کی مختلف سطحوں پر فضائی حدود کی مشترکہ عملی اہمیت کو اجاگر کیا گیا، جبکہ شرکاء نے اس بامقصد اور فکر انگیز مباحثے کے انعقاد پر کَیس لاہور کی کاوشوں کو سراہا۔
