فیڈرل بورڈ آف ریونیو کے ماتحت کسٹمز انفورسمنٹ ٹیم ملتان نے اسمگلنگ کی بڑی کوشش ناکام بناتے ہوئے کروڑوں روپے مالیت کی اشیا برآمد کر لیں۔
ایران کا دوبارہ جوہری تنصیبات کی تعمیر کا اعلان
ایف بی آر کے مطابق کلیکٹریٹ آف کسٹمز انفورسمنٹ ملتان نے انسدادِ اسمگلنگ کی فوری کارروائی کے دوران کوٹ ادو روڈ پر قصبہ گجرات کے قریب ایک بیڈفورڈ ٹرک سے اسمگل شدہ قیمتی سامان برآمد کیا۔
حکام نے بتایا کہ اسمگل شدہ اشیا کو ریت کی تہہ کے نیچے چھپایا گیا تھا تاکہ ان کی نشان دہی نہ ہو سکے، تاہم تفصیلی معائنے کے دوران ٹیم نے بھاری مقدار میں چھالیہ، سگریٹ، چائنا سالٹ اور جے ایم گٹکا برآمد کر لیا۔
ایف بی آر کے بیان کے مطابق ضبط شدہ اشیا اور گاڑی کی مجموعی مالیت تقریباً ایک کروڑ 55 لاکھ 46 ہزار روپے ہے، جبکہ کسٹمز ایکٹ 1969 کے تحت قانونی کارروائی شروع کر دی گئی ہے۔
ادارے نے غیر قانونی تجارت کے خلاف کارروائی میں کامیابی پر ملتان کسٹمز انفورسمنٹ ٹیم کی مستعدی کو سراہا اور کہا کہ ایف بی آر قانونی کاروبار کے تحفظ، قومی محصولات کے استحکام اور غیر قانونی تجارت کے معیشت و عوامی صحت پر منفی اثرات کی روک تھام کے لیے اپنے عزم پر قائم ہے۔
