پنجاب میں ایک افسوسناک واقعہ سامنے آیا ہے، جہاں نابینا خاتون کو مدد کے بہانے کئی ماہ تک جنسی زیادتی کا نشانہ بنایا گیا اور اس سے زبردستی بھیک منگوائی گئی، جبکہ ملزم اب تک گرفتار نہیں ہوسکا۔
متاثرہ خاتون نے اپنے بیان میں بتایا کہ ایک شخص نے ہمدردی کا ڈھونگ رچا کر اسے اپنے جھانسے میں لیا اور طویل عرصے تک زیادتی کا نشانہ بناتا رہا۔ وہ اسے بہلا پھسلا کر لاہور لے گیا، جہاں نہ صرف جنسی زیادتی کرتا رہا بلکہ زبردستی بھیک منگواتا اور اس کی کمائی خود رکھ لیتا تھا۔
خاتون کے مطابق ملزم نے نکاح کا جھانسہ دے کر اسے سابق شوہر سے طلاق دلوائی، پھر اس کے طلائی زیورات اور نقدی بھی چھین لی۔ مسلسل ظلم سہنے کے بعد نابینا خاتون کسی طرح ملزم کے چنگل سے بھاگ کر واپس اپنے علاقے بی پلاٹ پہنچ گئی۔
خاتون کا کہنا ہے کہ جب اس نے پولیس سے رجوع کرنے کی کوشش کی تو ملزم نے اسے قتل کی دھمکیاں دیں۔ اس نے انصاف کے حصول کے لیے میڈیا سے مدد طلب کی، جس کے بعد پولیس نے فوری طور پر مقدمہ درج کرلیا۔
نابینا خاتون نے وزیراعلیٰ پنجاب اور اعلیٰ حکام سے اپیل کی ہے کہ اسے انصاف فراہم کیا جائے اور ملزم کو گرفتار کر کے عبرتناک سزا دی جائے۔
