اسلام آباد (ویب ڈیسک) وزیر خزانہ محمد اورنگزیب نے کہا ہے کہ پاکستان سعودی سرمایہ کاروں کا خیرمقدم کرتا ہے اور سرمایہ کاری کے لیے سازگار ماحول فراہم کرنا حکومت کی ذمہ داری ہے۔
اپنے ورچوئل خطاب میں وزیر خزانہ نے کہا کہ سعودی عرب کے ویژن 2030 کو دنیا میں ایک منفرد مقام حاصل ہے اور پاکستان اس ویژن سے بہت کچھ سیکھ رہا ہے۔
محمد اورنگزیب کا کہنا تھا کہ تین بڑی عالمی ریٹنگ ایجنسیوں نے پاکستانی معاشی اشاریوں کو مثبت قرار دیا ہے، جو معیشت میں مثبت رجحان کی عکاسی کرتا ہے۔ اب حکومت برآمدات پر مبنی پائیدار معاشی ترقی کے لیے پرعزم ہے۔
انہوں نے مزید کہا کہ توانائی، ٹیکس اور دیگر معاشی شعبوں میں بنیادی اصلاحات کے ایجنڈے پر عمل جاری ہے، اور یہ اصلاحاتی عمل تمام متعلقہ فریقوں کی مشاورت سے آگے بڑھایا جا رہا ہے۔ ان کے مطابق حکومتی کاوشوں کے نتیجے میں ملک نے معاشی استحکام حاصل کر لیا ہے۔
وزیر خزانہ نے یہ بھی کہا کہ حکومت کو سیلاب زدگان کی بحالی کے چیلنج کا سامنا ہے، تاہم اس ضمن میں اقدامات جاری ہیں۔
