گلگت: اینٹی کرپشن اسٹیبلشمنٹ گلگت بلتستان نے ایک وضاحتی بیان جاری کرتے ہوئے واضح کیا ہے کہ ادارے کے قیام کا مقصد سرکاری محکموں، اداروں اور کارپوریشنز میں بدعنوانی کا خاتمہ ہے، جس کے لیے حقائق تک رسائی، شفاف تحقیقات اور قانونی کارروائی عمل میں لائی جاتی ہے۔
بیان میں کہا گیا ہے کہ ادارے کی جانب سے تقریباً تمام سرکاری محکموں کو معلومات کی فراہمی کے لیے باقاعدہ خطوط ارسال کیے گئے ہیں۔ اینٹی کرپشن قوانین کے تحت تمام سرکاری ادارے اس بات کے پابند ہیں کہ وہ مطلوبہ معلومات مقررہ وقت کے اندر فراہم کریں۔
کسی ادارے کی طرف سے معلومات چھپانا، تحقیقات میں رکاوٹ ڈالنا یا یہ کہنا کہ کارروائی ذاتی عناد پر مبنی ہے، نہایت غیر مناسب اور قانون سے روگردانی کے مترادف ہے۔ اینٹی کرپشن نے واضح کیا ہے کہ میڈیا کے ذریعے ادارے کے قانونی اختیارات کے بارے میں غلط بیانی نہ صرف شفاف تحقیقات میں رکاوٹ بننے کی کوشش ہے بلکہ اس سے بدعنوان عناصر کی حوصلہ افزائی بھی ہوتی ہے۔
بیان میں مزید کہا گیا کہ ترقیاتی اسکیموں میں بے ضابطگیوں سے متعلق شکایات کی بنیاد پر مختلف اداروں سے معلومات طلب کی گئیں، جن میں سے بیشتر نے بروقت تعاون کرتے ہوئے درکار معلومات فراہم کیں۔
اینٹی کرپشن رولز 2019 کے تحت، ادارے کو رول 7(5) کے مطابق یہ اختیار حاصل ہے کہ وہ کسی بھی سرکاری محکمے، خودمختار ادارے یا کارپوریشن سے مطلوبہ معلومات اور دستاویزات براہِ راست حاصل کر سکے۔ اسی طرح رول 20 کے مطابق ادارے کے سربراہ کو مکمل اختیار حاصل ہے کہ وہ کسی بھی معاملے کی تحقیقات کا حکم دے اور کسی فرد یا ادارے سے معلومات طلب کرے، اس کے لیے کسی مجاز اتھارٹی سے پیشگی اجازت درکار نہیں۔
بیان میں اس امر پر افسوس کا اظہار کیا گیا کہ ایک مخصوص ادارے کے سربراہ کی جانب سے تحقیقات مکمل ہونے سے قبل میڈیا پر غیر ذمہ دارانہ بیانات دیے گئے، جو عوام کو گمراہ کرنے کی کوشش اور قانونی اقدامات کے منافی ہیں۔ اینٹی کرپشن اسٹیبلشمنٹ نے واضح کیا کہ شفافیت اور احتساب کے عمل کو ہر صورت یقینی بنایا جائے گا اور کسی بھی دباؤ یا مداخلت کے بغیر تحقیقات جاری رکھی جائیں گی۔
