فرانس کے شہر نیوویل-سور-سون میں ایک شخص نے اپنے صحن میں سوئمنگ پول کی کھدائی کے دوران حیرت انگیز دریافت کی، جب زمین کے اندر سے سونا برآمد ہوا جس کی مالیت تقریباً 8 لاکھ امریکی ڈالر بتائی جا رہی ہے۔
کترینہ کیف اور وکی کوشل کے گھر ننھے مہمان کی آمد
یہ واقعہ رواں سال مئی میں پیش آیا، تاہم مقامی حکام نے اس کی تصدیق بدھ کے روز کی۔ شہری نے سونا ملنے کے فوراً بعد انتظامیہ کو اطلاع دی، جس کے بعد کی جانے والی تحقیقات میں یہ بات سامنے آئی کہ خزانہ کسی آثارِ قدیمہ کی جگہ سے تعلق نہیں رکھتا۔ اس لیے ضلعی کونسل نے فیصلہ کیا کہ سونا دریافت کرنے والے شہری کی ملکیت رہے گا۔
مقامی اخبار *لو پروگریس* کے مطابق، شہری کو زمین کے اندر پلاسٹک کے تھیلوں میں بند پانچ سونے کی اینٹیں اور متعدد سکے ملے۔ پولیس نے تصدیق کی کہ یہ سونا قانونی ذرائع سے حاصل کیا گیا تھا اور تقریباً 15 سے 20 سال قبل قریبی ریفائنری میں تیار کیا گیا تھا۔
ٹاؤن ہال کے مطابق، زمین کا پہلا مالک وفات پا چکا ہے اور یہ اب تک واضح نہیں ہو سکا کہ سونا وہاں کس نے دفن کیا تھا۔ اس واقعے نے مقامی آبادی میں خاصا تجسس پیدا کر دیا ہے۔
ماہرین کا کہنا ہے کہ فرانس میں اس نوعیت کی دریافت نہایت نایاب ہے اور ممکنہ طور پر یہ ملک میں حالیہ برسوں کے دوران ملنے والا سب سے قیمتی نجی خزانہ ہو سکتا ہے۔
