اسلام آباد: سپریم کورٹ نے آئندہ ہفتے کے لیے ججز روسٹر اور کاز لسٹ جاری کر دی ہے، جس کے مطابق عدالتِ عظمیٰ میں 8 ریگیولر بنچ مختلف نوعیت کے مقدمات کی سماعت کریں گے۔
بنچ نمبر ایک کی سربراہی چیف جسٹس یحییٰ آفریدی کریں گے، جن کے ہمراہ جسٹس شفیع محمد صدیقی اور میاں گل حسن اورنگزیب شامل ہوں گے۔
پنجاب میں امن و امان کا غیر معمولی اجلاس؛ انتہا پسند جماعت پر پابندی کی سفارش کا فیصلہ
بنچ نمبر دو میں جسٹس منصور علی شاہ اور جسٹس عقیل احمد عباسی، جبکہ بنچ نمبر تین میں جسٹس منیب اختر اور جسٹس عائشہ ملک سماعت کریں گے۔
آئینی نوعیت کے مقدمات کی سماعت بنچ نمبر چار کرے گا، جس کی سربراہی جسٹس امین الدین خان کریں گے۔ اس بنچ میں جسٹس جمال خان مندوخیل، جسٹس محمد علی مظہر، جسٹس حسن اظہر رضوی اور جسٹس شاہد بلال حسن شامل ہیں۔
بنچ نمبر پانچ میں جسٹس اطہر من اللہ، جسٹس عرفان سعادت خان اور جسٹس ملک شہزاد احمد خان، جبکہ بنچ نمبر چھ میں جسٹس شاہد وحید اور جسٹس نعیم اختر افغان شامل ہوں گے۔
بنچ نمبر سات کی سربراہی جسٹس مسرت ہلالی کریں گی جن کے ہمراہ جسٹس صلاح الدین پنہور ہوں گے، جبکہ بنچ نمبر آٹھ میں جسٹس محمد ہاشم کاکڑ، جسٹس اشتیاق احمد خان اور جسٹس علی باقر نجفی سماعت کریں گے۔
ذرائع کے مطابق آٹھ رکنی خصوصی آئینی بنچ جسٹس امین الدین خان کی سربراہی میں 26ویں آئینی ترمیم کیس کی سماعت کرے گا۔ آئندہ ہفتے سپریم کورٹ میں سپر ٹیکس، 26ویں آئینی ترمیم اور حج اسکینڈل سے متعلق اہم درخواستوں کی سماعت بھی متوقع ہے۔
