اسلام آباد (ویب ڈیسک) وزیر دفاع خواجہ آصف نے کہا ہے کہ ہزاروں طالبان کو عمران خان نے پاکستان لا کر بسایا اور آج بھی پی ٹی آئی دہشت گردوں سے مذاکرات کی بات کر رہی ہے۔
سماجی رابطے کی ویب سائٹ "ایکس” پر جاری اپنے بیان میں خواجہ آصف نے کہا کہ افغان حکومت کے ساتھ برسوں پر محیط مذاکرات اور وفود کے کابل آنے جانے کے باوجود پاکستان میں خونریزی کا سلسلہ ختم نہیں ہوا۔
ان کا کہنا تھا کہ کئی سالوں سے پاکستان کی فوج اور عوام کا خون بہایا جا رہا ہے اور روزانہ فوجی جوانوں کے جنازے اٹھ رہے ہیں۔
خواجہ آصف نے مزید کہا کہ 60 لاکھ افغان مہاجرین کی ساٹھ سال تک کی مہمان نوازی کی قیمت ہم اپنے خون سے ادا کر رہے ہیں۔
وزیر دفاع نے واضح کیا کہ اب وقت آ گیا ہے کہ افغان مہمان اپنے گھروں کو واپس جائیں اور یہ محسن کشی کا سلسلہ بند کیا جائے۔ انہوں نے کہا کہ یہ کیسے مہمان ہیں جو اپنے میزبانوں کا خون بہاتے ہیں اور قاتلوں کو پناہ دیتے ہیں۔
