وزیراعلیٰ گلگت بلتستان حاجی گلبر خان نے صوبائی وزراء کے ہمراہ پریس کانفرنس کرتے ہوئے کہا ہے کہ حالیہ دنوں گلگت کے حالات کشیدہ ضرور رہے، تاہم اللہ کے فضل سے خطہ بڑی تباہی سے محفوظ رہا۔
وزیراعلیٰ نے بتایا کہ امیر تنظیم اہل سنت والجماعت، مولانا قاضی نثار احمد پر حملے میں وہ اور ان کے محافظ زخمی ہوئے، تاہم ان کی حالت اب خطرے سے باہر ہے۔
انہوں نے کہا کہ واقعے کے بعد حکومت نے فوری کارروائی کرتے ہوئے دہشت گردوں کے سہولت کاروں کے خلاف آپریشن شروع کر دیا ہے۔ اب تک 8 مقامی سہولت کاروں کو گرفتار کیا جا چکا ہے، جن کے بارے میں مکمل تفصیلات حاصل کر لی گئی ہیں، جبکہ اصل مجرموں کی گرفتاری بھی جلد متوقع ہے۔
وزیراعلیٰ نے واضح کیا کہ فرقہ واریت پھیلانے والے عناصر کی مکمل نشاندہی کی جا رہی ہے اور گلگت بلتستان بھر میں سیکیورٹی ہائی الرٹ کر دی گئی ہے۔
انہوں نے مولانا قاضی نثار کی جرات کو سراہتے ہوئے کہا کہ انہوں نے گولی لگنے کے باوجود امن کا پیغام دے کر قوم کے دل جیت لیے۔ وزیراعلیٰ نے کہا کہ عوام نے بھی اتحاد و اتفاق کا مظاہرہ کر کے دشمن عناصر کے عزائم کو ناکام بنایا۔
حاجی گلبر خان نے نوجوانوں سے اپیل کی کہ وہ سوشل میڈیا پر اشتعال انگیز بیانات سے گریز کریں اور دہشتگردوں کی نشاندہی میں حکومت کا ساتھ دیں۔ ان کا کہنا تھا کہ علماء کرام سے مشاورت جاری ہے اور اصل مجرموں کو جلد قانون کے کٹہرے میں لاکر عبرتناک سزا دی جائے گی۔
وزیراعلیٰ نے کہا کہ گلگت بلتستان کے عوام ہمیشہ سے محب وطن اور پرامن رہے ہیں اور حکومت، عوام کے تعاون سے علاقے میں مکمل امن یقینی بنائے گی۔
