فیفا کے زیر اہتمام چلی میں کھیلے گئے 24 ویں انڈر 20 ورلڈ کپ کے فائنل میں مراکش نے شاندار کارکردگی کا مظاہرہ کرتے ہوئے ارجنٹائن کو 0-2 سے شکست دے کر تاریخ رقم کر دی۔
یہ کامیابی مراکش کی فٹبال تاریخ کی سب سے بڑی فتح قرار دی جا رہی ہے۔
غزہ امن معاہدہ بچانے کیلئے امریکی نائب صدر ہنگامی طور پر اسرائیل روانہ
سانتیاگو کے جولیو مارٹینیز پرادانوس نیشنل اسٹیڈیم میں کھیلے گئے فائنل میں محمد یاسر زبیری نے بہترین کھیل پیش کیا اور 12ویں اور 29ویں منٹ میں دو گول اسکور کیے۔ ان کی شاندار کارکردگی پر انہیں میچ کا بہترین کھلاڑی قرار دیا گیا۔
اس تاریخی کامیابی کے ساتھ مراکش 2009 کے بعد انڈر 20 ورلڈ کپ جیتنے والا پہلا افریقی ملک بن گیا، اس سے قبل یہ اعزاز گھانا نے حاصل کیا تھا۔
ٹورنامنٹ کے دوران مراکش نے مسلسل عمدہ کھیل پیش کیا اور ناک آؤٹ مرحلے میں جنوبی کوریا، امریکا اور فرانس جیسی مضبوط ٹیموں کو شکست دے کر فائنل میں جگہ بنائی۔
دوسری جانب ارجنٹائن کی ٹیم، جو پورے ٹورنامنٹ میں ناقابلِ شکست رہی تھی، فائنل میں اپنے دو اہم کھلاڑیوں — بائر لیورکوزن کے کلاڈیو ایچیواری اور ریئل میڈرڈ کے فرانکو ماستانتوانو — کی غیر موجودگی کے باعث کمزور نظر آئی۔
