واشنگٹن: وزیر خزانہ محمد اورنگزیب نے کہا ہے کہ پاکستان کو آئی ایم ایف سے 1.2 ارب ڈالر کی اگلی قسط دسمبر تک ملنے کی توقع ہے۔
وزیر خزانہ محمد اورنگزیب ان دنوں امریکا کے دورے پر ہیں، جہاں انہوں نے 20 وزارتی اجلاس میں شرکت کی اور لاس اینڈ ڈیمیج فنڈ کو فوری طور پر فعال کرنے پر زور دیا۔
ان کی انٹرنیشنل فنانس کارپوریشن کے مینیجنگ ڈائریکٹر مختار ڈیوپ سے ملاقات بھی ہوئی، جس میں انہوں نے امید ظاہر کی کہ ایگزِم بینک جلد ریکوڈک منصوبے میں شمولیت اختیار کرے گا۔
صحافی کے سوال پر وائٹ ہاؤس کے ترجمان کا نامناسب جواب؟ جانئے
محمد اورنگزیب نے جے پی مورگن کے سینئر انتظامی وفد سے بھی ملاقات کی، جہاں دوطرفہ شراکت داری کو مزید فروغ دینے پر اتفاق کیا گیا۔
واشنگٹن میں پریس کانفرنس کرتے ہوئے وزیر خزانہ نے بتایا کہ آئی ایم ایف ایگزیکٹو بورڈ جلد اجلاس میں معاہدے کی منظوری دے گا، اور پاکستان کو 31 دسمبر تک 1.2 ارب ڈالر کی قسط ملنے کی توقع ہے۔
انہوں نے کہا کہ آئی ایم ایف پاکستان پر قومی مفاد کے خلاف کوئی شرط عائد نہیں کر سکتا۔ پروگرام کے تحت کی گئی اصلاحات نے معیشت کو استحکام دیا ہے اور تمام اقدامات پاکستان کی اپنی معاشی ترجیحات کے مطابق ہیں۔
وزیر خزانہ نے مزید کہا کہ امریکا کے ساتھ تجارتی اور ٹیرف معاہدہ ایک سے دو ہفتوں میں متوقع ہے، جبکہ حکومت نیویارک کے روزویلٹ ہوٹل کی نجکاری سے متعلق فیصلے کے قریب پہنچ چکی ہے۔
